«Лаура» шамалы жакындап келаткандыктан, АКШнын Техас жана Луизиана штаттарынын губернаторлору жээкке жакын жерде жашаган 500 миң адамды коопсуз аймакка көчүрүүгө буйрук беришти.
27-августта бул аймактарга жакындап калган күчтүү шамал төртүнчү даражадагы бороон деп сыпатталууда. Анын айынан көптөгөн шаар-кыштактарды суу капташы ыктымал.
АКШнын Бороондорду изилдөө боюнча улуттук борбору «Лауранын» ылдамдыгы саатына 240 чакырымга жетип жатканын билдирди.
Адистер шамалдан улам суу алты метрге чейин көтөрүлөрүн божомолдошууда. Бул кырдаал Порт-Артур, Лейк-Чарльз сыяктуу ири шаарлар үчүн кооптуу.
