1-сентябрда Жогорку Кеңештин VI чакырылышынын кезектеги сессиясы ачылды. Депутаттар жайкы эс алуудан кийинки биринчи жумушчу күнүн өпкөсүнөн кагынып (пневмония) 7-июлда каза болгон депутат Чыныбай Турсунбековду эскерүү менен башташты.
Парламент төрагасы Дастанбек Жумабеков эл өкүлдөрү 1-2-сентябрь күндөрү комитеттерде иш алып барышарын, жалпы жыйын 3-сентябрда болорун айтты. Ага чейин танапис жарыяланды.
VI чакырылыштагы Жогорку Кеңештин депутаттарынын мөөнөтү бир айдан соң аяктап, 4-октябрда кезектеги парламенттик шайлоо болот. Азыркы депутаттардын көбү кийинки чакырылышка да ат салышарын жарыялашкан. Алар 4-сентябрдан тартып бир айлык үгүт менен алек болушат.
Жогорку Кеңештин регламентине ылайык, депутаттар 30-июнда жайкы тыныгууга тарап, 1-июлдан тартып өлкө аймагындагы шайлоочулар менен жеринде иш алып барышы керек. Августта эмгек өргүүсүнө чыгышат. (BTo)
