Линктер

ЧУКУЛ КАБАР!
1-Август, 2021 жекшемби, Бишкек убактысы 18:50

Президент: Комуз - маданиятыбыздын туу чокусу


Комуз.

Бул тууралуу президент Сооронбай Жээнбеков кыргызстандыктарды 9-сентябрь - Комуз күнү менен куттуктоосунда айтты.

Президенттин басма сөз кызматы тараткан маалыматта «Биздин элибиз үчүн комуз — жөн гана салттуу музыкалык аспап эмес, маданиятыбыздын туу чокусу «Манас» эпосу менен катар, бабалардын даңктуу жолун урпактарга күү аркылуу жеткирип турган мурас» деп айтылат.

2019-жылы президенттин жарлыгы менен Кыргызстанда 9-сентябрь Комуз күнү деп жарыяланган.

Кыргыз өкмөтү быйыл 7-13-сентябрь күндөрүн Комуз жумалыгы деп жарыялаган. Эпидемиологиялык шартка байланыштуу жумалыкка арналган иш-чаралар онлайн форматта өтүп жатат. Илимий-практикалык конференция, «Таңшы, комуз» онлайн концерти жана видео сабактар залкар жана жаш комузчулардын катышуусунда уюштурулууда. Аларды «Маданият. Тарых. Тил» телеканалынан жана Маданият, маалымат жана туризм министрлигинин «Фейсбуктагы» баракчасынан түз эфирде көрсө болот.

Комуз - кыргыз элинин чертме музыкалык аспабы. Ал өрүк, жаңгак, арча жана башка бир катар жыгачтардан чабылат. Жалбырактары күбүлгөн жана мөмөсү бышкан кезде кыйылган өрүктүн жыгачы сомдолуп, сууга кайнатылып, ышталып чабылган комуз бек жана добуштуу болот. Комуз турпаты баш, моюн, тулку, чара, капкак, куткун, тепкек, үч кулак, үч кылдан турат.

Кыргыз салттуу музыкасынын басымдуу бөлүгү комуз менен байланыштуу. (BTo)

Пикирлерди көрүңүз (2)

«Азаттыктын» материалдарына пикир калтырууда төмөнкү эрежелерди так сактоону өтүнөбүз: кайсы бир саясий партияга, топко үгүттөгөн, же каралаган, бир нече жолу кайталап жиберилген, адамдын беделине шек келтирген, келекелеген, кордогон, коркутуп-үркүткөн, басмырлаган жана жек көрүүнү козуткан пикирлер жарыяланбайт. Эрежени сактабай жазылган пикирлер сайтка чыкпайт. Модератор пикирлерди жарыялоо же андан баш тартуу укугун өзүнө калтырат.
Бул шерине жабылды, эми талкуу "Фейсбуктагы" барагыбызда (Azattyk.unalgysy) уланат.

XS
SM
MD
LG