Линктер

ЧУКУЛ КАБАР!
20-Январь, 2021 шаршемби, Бишкек убактысы 21:17

Беларуста оппозициянын Координациялык кеңешинин дагы бир мүчөсү кармалды


Максим Знак.

Беларус оппозициясынын Координациялык кеңешинин президиумунун дагы бир мүчөсү Максим Знакты 9-сентябрда эртең менен кармап кетишти. Бул тууралуу жергиликтүү «Телеграм» каналдар кабарлашты. Анын адвокаты бул ишти Тергөө комитети карап жатканын, себеби азырынча белгисиз экенин TUT.BY сайтына айтып берди.

Ал эми Минскинин милиция башкармалыгы Знактын кармалышы тууралуу маалыматы жок экенин билдирди.

Ал ортодо TUT.BY сайтынын кабарчысы жеринен кабарлагандай, президенттикке талапкер, абакта отурган Виктор Бабариконун штабына кабарчыларды киргизбей , кеңселерде белгисиз адамдар тинтип, бүлдүрүп жүрүштү. Кийин ал жакка Ички иштер министрлигинин кызматкерлери барышты.

Юрист Знак кармалгандан кийин президиумдун бир эле мүчөсү, Нобел сыйлыгынын лауреаты, жазуучу Светлана Алексиевич гана эркиндикте калды. Ал саламаттыгына байланыштуу кеңештин ишине толук катышкан эмес. Калгандары же кармалган же чет өлкөдө жүрүшөт.

Бийликти өткөрүү боюнча Координациялык кеңеш президенттик шайлоодо Александр Лукашенкого негизги атаандаш болуп чыккан Светлана Тихановскаянын демилгеси менен түзүлгөн. «Бийликти басып алуу» беренесине ылайык козголгон кылмыш ишинин алкагында анын улам бир мүчөсүн суракка чакырып келатышат.

Пикирлерди көрүңүз (2)

«Азаттыктын» материалдарына пикир калтырууда төмөнкү эрежелерди так сактоону өтүнөбүз: кайсы бир саясий партияга, топко үгүттөгөн, же каралаган, бир нече жолу кайталап жиберилген, адамдын беделине шек келтирген, келекелеген, кордогон, коркутуп-үркүткөн, басмырлаган жана жек көрүүнү козуткан пикирлер жарыяланбайт. Эрежени сактабай жазылган пикирлер сайтка чыкпайт. Модератор пикирлерди жарыялоо же андан баш тартуу укугун өзүнө калтырат.
Бул шерине жабылды, эми талкуу "Фейсбуктагы" барагыбызда (Azattyk.unalgysy) уланат.

XS
SM
MD
LG