Линктер

ЧУКУЛ КАБАР!
2-декабрь, 2020 шаршемби, Бишкек убактысы 03:32

Курсан Асанов: Талап-тоноого аракет кылгандарга катуу чара көрүшүбүз керек


ИИМдин жетекчисинин милдетин аткаруучу Курсан Асанов милиция жетекчилери менен жыйын курууда. 2020-жылдын 8-октябры.

Ички иштер министринин милдетин аткаруучу, Бишкек шаарынын коменданты Курсан Асанов милициянын ыкчам кызматтарынын жетекчилерин чогултуп, жыйын өткөрдү. ИИМдин басма сөз кызматы кабарлагандай, жыйынга Экстремизмге жана мыйзамсыз миграцияга каршы аракеттенүү боюнча кызматтын, Баңгизаттарды мыйзамсыз жүгүртүүгө каршы күрөш кызматынын, Криминалдык милиция кызматынын жана Тергөө кызматынын башчылары катышты.

Асанов «тынчтык митингине чыккан жарандарды күч менен куубай, мыйзамдуу жолго өтүшүбүз керек» деп, милициянын аймактарда иштеген жетекчилерин эч ким бошотпогонун, алар өз орундарында иштей берерин билдирди.

Ошону менен катар ал «айрым жарандар мыйзамсыз иш-аракеттерге барып, талап-тоноого аракет кылып жатышканын», андайга жол бербей, катуу чара көрүш керек экенин кошумчалады.

Ыкчам кызматтардын жетекчилерине өлкөдөгү саясий кырдаалга байланыштуу коопсуздук чараларын күчөтүү жана ыктыярдуу элдик кошуундар менен бирге мыйзамсыз иш-аракеттерге жол бербөө боюнча бир катар тапшырмаларды берди.

4-октябрдагы парламенттик шайлоодон кийин Кыргызстанда анын жыйынтыгына нааразы болгондордун митинги президенттин жана парламенттин кеңсеси жайгашкан имаратка кирип баруу менен аяктаган. Имараттын ичи талкаланып, өрт чыккан. Бул окуялардан кийин Борбордук шайлоо комиссиясы акыркы парламенттик шайлоонун жыйынтыгын жокко чыгарган.

Президент Сооронбай Жээнбеков ошондон бери иш ордуна бара элек, парламент жалпы жыйынга чогула албай жатат. Премьер-министрлик кызмат талашта турат. Бишкекте топтошкон адамдар тарап кете элек. (RK)

Пикирлерди көрүңүз (3)

«Азаттыктын» материалдарына пикир калтырууда төмөнкү эрежелерди так сактоону өтүнөбүз: кайсы бир саясий партияга, топко үгүттөгөн, же каралаган, бир нече жолу кайталап жиберилген, адамдын беделине шек келтирген, келекелеген, кордогон, коркутуп-үркүткөн, басмырлаган жана жек көрүүнү козуткан пикирлер жарыяланбайт. Эрежени сактабай жазылган пикирлер сайтка чыкпайт. Модератор пикирлерди жарыялоо же андан баш тартуу укугун өзүнө калтырат.
Бул шерине жабылды, эми талкуу "Фейсбуктагы" барагыбызда (Azattyk.unalgysy) уланат.

XS
SM
MD
LG