Линктер

ЧУКУЛ КАБАР!
23-Январь, 2021 ишемби, Бишкек убактысы 03:18

«Үмүт» кыймылы бийликти мыйзам нугуна кайтууга чакырууда


Бишкектин борбордук аянты. 2020-жылдын 5-октябры.

Бүгүн 5-ноябрда Бишкекте «Үмүт» аттуу кыймыл жыйын өткөрүп, өлкөдө түзүлгөн саясий абал боюнча өз пикирин билдирет. Анын өкүлү Мухаммед Агибаев «Азаттык» радиосуна кабарлагандай, бул кыймыл парламенттик шайлоодон кийинки нааразылык учурунда түзүлгөн жана курамына бир нече саясий партия кирген.

Агибаев бүгүнкү жыйында бийликти мыйзам нугуна кайтууга чакырыктар айтылып, сунуштар киргизилерин кабарлап, шайлоодон кийинки нааразылык акциясында коюлган талаптар аткарылбай жатканын белгиледи:

«Люстрация болсун, жаңы жүздөр келсин деген ураан менен чыккан элек. Жаңы жүздөр өтө эле аз болууда. Эски карталарды эле кайра аралаштырып, дайындап жатат. Бул эч кандай жаңылануу эмес».

Агибаевдин айтымында, «Үмүт» кыймылы парламенттик кайра шайлоо Конституцияда жазылган мөөнөттө өткөрүлбөй калганын мыйзам бузуу деп атап, эл аралык коомчулук Кыргызстанды тааныбай жатканын белгилөөдө.

Жыйындын соңунда мына ушул маселелер камтылган резолюция кабыл алынат.

4-октябрда өткөн кезектеги парламенттик шайлоонун баштапкы жыйынтыгына нааразылык күчөп, өлкөдө бийлик алмашкан. Жогорку Кеңешке кайра шайлоонун датасы аныктала элек. Жаңы бийлик ага мөөнөтүнөн мурда президенттик шайлоо жана конституциялык реформа өткөргөндөн кийин киришерин айтууда.

Президенттин милдетин аткаруучу премьер-министр Садыр Жапаров өткөн аптада өкмөттүн жыйынында сүйлөп жатып жаңы кадрларды даярдоодо кемчиликтер бар экенин белгилеп, алардын баары бир нече айдан кийин кайра сынак аркылуу кабыл алынарын айткан.

Жапаров 6-октябрдагы окуялардан кийин өлкө мыйзам нугуна кайра кайтканын айтып келет. (RK)

Пикирлерди көрүңүз (8)

«Азаттыктын» материалдарына пикир калтырууда төмөнкү эрежелерди так сактоону өтүнөбүз: кайсы бир саясий партияга, топко үгүттөгөн, же каралаган, бир нече жолу кайталап жиберилген, адамдын беделине шек келтирген, келекелеген, кордогон, коркутуп-үркүткөн, басмырлаган жана жек көрүүнү козуткан пикирлер жарыяланбайт. Эрежени сактабай жазылган пикирлер сайтка чыкпайт. Модератор пикирлерди жарыялоо же андан баш тартуу укугун өзүнө калтырат.
Бул шерине жабылды, эми талкуу "Фейсбуктагы" барагыбызда (Azattyk.unalgysy) уланат.

XS
SM
MD
LG