Прокурор Улукбек Өмүрзаков Ош облустук прокуратурасына бөлүмдүн прокурору болуп Баткен облусунан кайрадан Ошко 16-октябрда которулду. Бул туурасында Өмүрзаков 5-ноябрь күнү басма сөз жыйынын өткөрүп жатып айтты.
Анын айтымында Ошко которулушуна үй-бүлөлүк шарты себеп болгон.
«Мени которгондо (Баткен облусуна) бул жакка да Өткүрбек Жамшитов которгон. Себиби үй-бүлөлүк шартыма байланыштуу «шаардагы үйүмө которгула» деп арыз жаздым. Буйрукта да «Өмүрзаковдун арызынын негизинде» деп жазылып турат», - деди ал.
Улукбек Өмүрзаковду дайындаган башкы көзөмөл органынын жетекчиси Өткүрбек Жамшитов 2018-жылдын апрелинде дайындалып, 2020-жылдын 21-окябрында өз арызы менен иштен кеткен.
Улукбек Өмүрзаков 2018-жылы Баткен облустук прокуратурасына бөлүмдүн прокурору болуп Оштон которулуп кеткен. 2015-жылдан тартып Ош облустук прокуратурасында иштеп келген.
Анын бир тууган агасы Сүйүн Өмүрзаков 2016-жылдан бери ички иштер министринин орун басары болуп иштейт. Өмүрзаковдордун үй-бүлөсүнө таандык «Мухамед-Умар» аттуу коомдук бирикме, спорт клуб жана күзөт агенттиги бар.
«Мухамед-Умардан» жапа чеккендер буга чейин «Азаттыкка» бир нече жолу кайрылышкан. Алардын акыркысы Канназар Ыдырысов кысым көргөнүн билдирип, президенттин милдетин аткаруучу, премьер-министр Садыр Жапаровго да кайрылган. УКМК Улукбек Өмүрзаковдун үстүнөн териштирүү иштери башталганын билдирди. Улукбек Өмүрзаков алардын үй-бүлөсүнө карата айтылган сөздөрдү 5-ноябрда уюштурган басма сөз жыйынында четке какты. (DU)
