Линктер

ЧУКУЛ КАБАР!
16-Январь, 2021 ишемби, Бишкек убактысы 15:00

ТИМ: Түркия саламаттык сактоо тармагындагы долбоорду ишке ашырууга даяр


Кыргызстан менен Түркиянын туулары.

Тышкы иштер министри Руслан Казакбаев 21-декабрда Түркиянын Кыргызстандагы эчиси Женгиз Фыратты кабыл алды.

Тышкы иштер министрлиги билдиргендей, тараптар Казакбаевдин быйыл 9-11-ноябрда Түркияда болгон иш сапарынын жыйынтыгын талкуулашты. Министр сапар кыргыз-түрк стратегиялык кызматташтыгынын артыкчылыктуу багыттарын аныктоого мүмкүндүк бергенин белгиледи.

Элчи Фырат саясий, соода-экономикалык жана маданий чөйрөлөрдө жигердүү кызматташтыкты мындан ары да өркүндөтүү керек экенин билдирди.

Тараптар COVID-19 пандемиясынын жайылышына каршы күрөшүүдө кызматташтык боюнча да пикир алмашкан. Казакбаев эпидемиянын кесепеттерин жоюуга жардам бергени үчүн түрк тарапка ыраазычылыгын билдирди.

Түрк элчиси Түркиянын координация жана кызматташуу агенттиги (ТИКА) Кыргызстандын аймактарында бейтапканалардын ачылышы, оңдолушу жана техникалык камсыздоо боюнча долбоорду ишке ашырууга даяр экенин айтты.

Мындан тышкары пандемия токтогондон кийин Бишкектеги оорукананын расмий ачылышы болуп, ага медицина тармагындагы түрк ишкерлер тобу келерин, алар Ысык-Көл бизнес-форумуна да катышарын маалымдады.

Ноябрдагы сапар учурунда өз ара кызматташтык маселелери менен катар эки мамлекеттин ортосундагы талылуу болгон жана түрк бийлиги ФЕТО деп атаган кыймыл тууралуу кеп козголгонун түрк тышкы иштер министри Мевлют Чавушоглу Казакбаев менен жолугушуудан кийинки басма сөз жыйынында билдирген. Ал түркиялык «Маариф» фонду боюнча эки тарап макулдашканын айтып, аталган фонд жакын арада Кыргызстанда билим берүү мекемелерин ача турганын белгилеген.

Түрк бийлиги АКШда бозгунда жашаган диний аалым Фетхулла Гүлендин «Хизмет» кыймылын ФЕТО деп атап, террорчул уюмдардын катарына кошуп келатат. Гүлен өзү мындай дооматтарды четке каккан.

Түркия Кыргызстанда 1992-жылдан бери иштеп келе жаткан «Себат» билим берүү мекемелерин да «гүленчил» көз карашта деген негизде аларды жабууну талап кылып келе жатат. Буга чейин Анкара алардын ордуна «Маариф» фонду билим берүү мекемелерин ачат деп сунуш кылган.

Кыргыз бийлиги «Себатты» өлкөнүн өзүнө таандык билим берүү мекемеси деп эсептеп, 2017-жылы «Сапат» деп аталышын өзгөрткөн.

Бийлик 2019-жылы Түркиянын мамлекетине караштуу «Маариф» фонду өлкөдө билим берүү борборлорун ача турганын жана ал өлкөнүн ички мыйзамдарына ылайык иштей турганын жарыялаган. (NT)

Пикирлерди көрүңүз

«Азаттыктын» материалдарына пикир калтырууда төмөнкү эрежелерди так сактоону өтүнөбүз: кайсы бир саясий партияга, топко үгүттөгөн, же каралаган, бир нече жолу кайталап жиберилген, адамдын беделине шек келтирген, келекелеген, кордогон, коркутуп-үркүткөн, басмырлаган жана жек көрүүнү козуткан пикирлер жарыяланбайт. Эрежени сактабай жазылган пикирлер сайтка чыкпайт. Модератор пикирлерди жарыялоо же андан баш тартуу укугун өзүнө калтырат.

XS
SM
MD
LG