Октябрдагы парламенттик шайлоонун эң негизги катасы алдыдагы президенттик шайлоодо жана референдумда кайталанбайт. Бул тууралуу 23-декабрда вице-премьер-министр Максат Мамытканов Бишкекте журналисттерге шайлоого карата даярдык тууралуу маалымат берип жатып айтты.
Мамытканов парламенттик шайлоонун жыйынтыгы жокко чыгарылышына көп сандаган шайлоочулар №2 форма менен добуш бергени себеп болгонун белгиледи:
«Ошонун кесепетинен элдин нааразылыгы чыккан. Бул шайлоодо эң чон катачылык кайталанбайт. Бул саясий чечим».
Быйыл 4-октябрдагы кезектеги парламенттик шайлоодо 500 миндей адам №2 форма аркылуу добушканаларды алмаштырган. 5-октябрда өлкөдө ири нааразылык акциялары башталып, Кыргызстанда бийлик алмашкан.
Кийин Жогорку Кеңештин депутаты Алтынбек Сулайманов баш болгон депутаттар тобу шайлоо босогосун, күрөөнү азайтуу жана №2 форма менен добуш берүү ыкмасын жокко чыгаруу боюнча мыйзам сунуш кылып, ал кабыл алынган. Чет жактагы шайлоочулардын мындай укугу калтырылган.
10-январда Кыргызстанда мөөнөтүнөн мурда президенттик шайлоо жана өлкөнү башкаруу формасын аныктоо боюнча референдум өтөт. (RK)
