Линктер

ЧУКУЛ КАБАР!
24-Сентябрь, 2021 жума, Бишкек убактысы 03:42

Коопсуздук кеңеши шайлоого даярдыкты талкуулады


Коопсуздук кеңешинин жыйыны. 2020-жылдын 24-декабры.

Өлкөнүн коопсуздук кеңеши бүгүн, 24-декабрда жыйын куруп, 10-январда боло турган президенттик шайлоого жана өлкөдөгү башкаруу формасын аныктоо боюнча референдумга даярдыкты талкуулады.

Президенттин милдетин аткаруучу, Жогорку Кеңештин төрагасы Талант Мамытов бул иш-чара өтө жооптуу экенин жана андан өлкөнүн келечеги түздөн-түз көз каранды болорун белгилеп, тийиштүү мамлекеттик органдар ишин так жана мыйзам чегинде аткарышы керек экенин айтты. Ошону менен катар ал парламенттик шайлоодогу катачылыктар кайталанбашы зарыл экенин белгиледи:

«Өткөндөн сабак алышыбыз абзел. Анткени 6-7-октябрда мыйзамсыз шайлоонун натыйжасында толкундоо болуп өттү. Анын жыйынтыгын билебиз. Мына ошондон улам бийлик алмашты. Президенттик шайлоо да, референдум да ошол чекиликтерди болтурбоо, элибизге жана мамлекетибизге чоң өзгөртүүлөрдү жасоо максатында өткөрүлүп жатат. Элибиз чоң өзгөрүүлөрдү күтүп жатат».

Жыйында Борборук шайлоо комиссиясынын, өкмөттүн жана башка тийиштүү мекемелердин маалыматы угулуп, талкууланды.

Жыйынтыгында мамлекеттик органдардын бардык жетекчилерине шайлоо менен референдумду коронавируска каршы чараларды камсыздоо менен катар ачык, айкын жана демократиялык принципте өткөрүү тууралуу талап коюлду.

25-декабрга чейин Ички иштер министрлиги менен Улуттук коопсуздук боюнча мамлекеттик комитет коомдук коопсуздукту камсыз кылыш үчүн бирдиктүү ыкчам штаб түзмөй болушту.

Быйыл 4-октябрдагы парламенттик шайлоонун жыйынтыгына каршы акциялар өлкөдө бийликтин алмашуусуна алып келип, президент кызматын тапшырып берген. Мөөнөтүнөн мурда президенттик шайлоо жана мамлекеттик башкаруу формасын аныктоо боюнча референдум 10-январда өткөнү жатат. (RK)

Пикирлерди көрүңүз (3)

«Азаттыктын» материалдарына пикир калтырууда төмөнкү эрежелерди так сактоону өтүнөбүз: кайсы бир саясий партияга, топко үгүттөгөн, же каралаган, бир нече жолу кайталап жиберилген, адамдын беделине шек келтирген, келекелеген, кордогон, коркутуп-үркүткөн, басмырлаган жана жек көрүүнү козуткан пикирлер жарыяланбайт. Эрежени сактабай жазылган пикирлер сайтка чыкпайт. Модератор пикирлерди жарыялоо же андан баш тартуу укугун өзүнө калтырат.
Бул шерине жабылды, эми талкуу "Фейсбуктагы" барагыбызда (Azattyk.unalgysy) уланат.

XS
SM
MD
LG