Линктер

ЧУКУЛ КАБАР!
27-Сентябрь, 2021 дүйшөмбү, Бишкек убактысы 05:03

HRW кыргыз парламентин кесиптик кошуундар боюнча жаңы мыйзамды чакыртып алууга үндөдү


Иллюстрациялык сүрөт.

«Human Rights Watch» (HRW) эл аралык укук коргоо уюму Кыргызстандын парламентин «Кесиптик кошуундар жөнүндө» мыйзам боюнча жаңы долбоорду артка чакыртып алууга үндөдү. Уюмдун расмий сайтына жарыяланган билдирүүдө бул мыйзам долбоору кесиптик кошуундардын ишин чектей турганы айтылып, бийлик кошуундардын лидерлерин куугунтукка алып, алардын жыйын өткөрүшүнө тоскоолдук кылып жатканы белгиленди.

HRW уюмунун Европа жана Борбор Азия боюнча изилдөөчүсү Сыйнат Султаналиева «Кыргызстандын жетекчилиги кесиптик кошуун кызматкерлеринин эркин уюмдашуу укугун урматташы, профсоюздардын ички ишине кийлигишпеши зарыл» деп билдирди.

Буга чейин Бишкекте Кесиптик кошуундар федерациясынын башкы имаратынын алдында бир нече жолу нааразылык акциясы өткөн. Пикетке чыккандар «Кесиптик кошуундар жөнүндө» жаңы мыйзамга каршы болуп, анын долбоорун Жогорку Кеңеш регламентти бузуу менен кабыл алганын, кошуундардын мүлкүн рейдерлик жол менен басып алуу, жетекчиликке «өз кишини» алып келүү аракети жүрүп жатканын айтышкан.

Мыйзам долбоорун Жогорку Кенештин тогуз депутаты иштеп чыккан. Быйыл 5-ноябрда парламент аны экинчи окууда кабыл алган.

Авторлордун бири, депутат Мирлан Бакиров долбоорду кабыл алууда регламент бузулбаганын айткан. Ал кесиптик кошуундардын ишмердүүлүгүн жөнгө салуучу азыркы мыйзамдын Конституцияга жана Эмгек кодексине каршы келген жерлери бар экендиги тууралуу Юстиция министрлигинин каты келип түшкөнүн эске салган. Ошондуктан негизги максат – ачык-айкындуулукту жана отчёттуулукту камсыз кылуу экенин билдирген.

Мыйзам долбооруна каршы пикирин буга чейин Бириккен Улуттар Уюмунун (БУУ) жана Европадагы Коопсуздук жана Кызматташтык Уюмунун (ЕККУ) өкүлдөрү да билдиришкен. (RK)

Пикирлерди көрүңүз (1)

«Азаттыктын» материалдарына пикир калтырууда төмөнкү эрежелерди так сактоону өтүнөбүз: кайсы бир саясий партияга, топко үгүттөгөн, же каралаган, бир нече жолу кайталап жиберилген, адамдын беделине шек келтирген, келекелеген, кордогон, коркутуп-үркүткөн, басмырлаган жана жек көрүүнү козуткан пикирлер жарыяланбайт. Эрежени сактабай жазылган пикирлер сайтка чыкпайт. Модератор пикирлерди жарыялоо же андан баш тартуу укугун өзүнө калтырат.
Бул шерине жабылды, эми талкуу "Фейсбуктагы" барагыбызда (Azattyk.unalgysy) уланат.

XS
SM
MD
LG