Линктер

ЧУКУЛ КАБАР!
19-Сентябрь, 2021 жекшемби, Бишкек убактысы 03:12

Адвокат Алмазбек Атамбаев дарыланууга муктаж экенин айтууда


Мурдагы президент Алмазбек Атамбаев сот залында. 2020-жылдын 11-ноябры.

Бир нече кылмыш иши боюнча айыпталган мурдагы президент Алмазбек Атамбаев ден соолугуна байланыштуу дарыланууга муктаж. Бул тууралуу анын адвокаты Замир Жоошев билдирди.

Анын айтымында, мурдагы президенттин омурткасынан эки грыжа табылгандыктан, ал көпкө чейин отура албайт. Мындан тышкары жүрөк жана башка оорулардан жабыркайт.

Жоошев Атамбаевге операция талап кылынабы же жокпу, дарыгерлер аныктоого тийиш экенин, бирок анын саламаттыгын жакшыртуу үчүн толук дарылоодон өтүшү керек экенин кошумчалады.

Алмазбек Атамбаев саламаттыгынан улам 13-14-январдагы соттук отурумдарга катышкан эмес. Жараяндар кийинкиге жылган. Актоочу тарап бейшембиде анын бөгөт чарасын өзгөртүү боюнча сотко өтүнүч киргизген.

Атамбаевге карата козголгон бир нече кылмыш иши ноябрдан бери Бишкектин Биринчи май райондук сотунда бириктирилип каралууда. Алар - Кой-Таш окуясы, Кой-Таштагы жер тилкеси, Бишкек ЖЭБиндеги жемкорлук, «Терек» сурма кениндеги коррупцияга байланышкан кылмыш иштери.

Быйыл январда адвокаттар Алмазбек Атамбаевге байланыштуу дагы бир кылмыш иши сотко өткөнүн билдиришкен. Маалыматка караганда, Бишкектин Калыс-Ордо конушундагы мектептин курулушу тууралуу иште Атамбаев кызмат абалынан кыянат пайдаланган деп шек саналууда.

Улуттук коопсуздук боюнча мамлекеттик комитеттин (УКМК) тергөө абагында отурган Атамбаев саламаттыгына байланыштуу жаңы жылдын алдында Бишкектеги №47 колонияга которулган.

Буга чейин Атамбаев кримтөбөл Азиз Батукаевдин түрмөдөн мыйзамсыз бошотулушуна байланыштуу 11 жыл эки айга эркинен ажыратылган.

Жогорку сот 30-ноябрда Батукаевдин түрмөдөн мыйзамсыз бошотулушуна байланыштуу райондук жана шаардык соттордун Атамбаевди 11 жылга эркинен ажыратуу тууралуу өкүмдөрүн жокко чыгарган. Иш кайра кароого Биринчи май райондук сотуна жөнөтүлгөн.

Райондук сот ишти кайрадан 10-декабрда кароого киришкен. (NT)

Пикирлерди көрүңүз (7)

«Азаттыктын» материалдарына пикир калтырууда төмөнкү эрежелерди так сактоону өтүнөбүз: кайсы бир саясий партияга, топко үгүттөгөн, же каралаган, бир нече жолу кайталап жиберилген, адамдын беделине шек келтирген, келекелеген, кордогон, коркутуп-үркүткөн, басмырлаган жана жек көрүүнү козуткан пикирлер жарыяланбайт. Эрежени сактабай жазылган пикирлер сайтка чыкпайт. Модератор пикирлерди жарыялоо же андан баш тартуу укугун өзүнө калтырат.
Бул шерине жабылды, эми талкуу "Фейсбуктагы" барагыбызда (Azattyk.unalgysy) уланат.

XS
SM
MD
LG