Линктер

ЧУКУЛ КАБАР!
3-Август, 2021 шейшемби, Бишкек убактысы 02:05

Кытай Помпео баш болгон америкалык 27 жаранга санкция салды


Майк Помпео.

Кытай бийлиги АКШнын мурдагы президенти Дональд Трамптын убагында жогорку даражалуу кызматтарды ээлеп келген 30дай аткаминерге санкция салды. Арасында кызматтан кетип жаткан мамлекеттик катчы Майк Помпео дагы бар.

«АКШнын тиешелүү аткаминерлери Кытайдын эгемендигин, коопсуздугун жана кызыкчылыктарын олуттуу бузганы үчүн Бээжин жооп иретинде санкция киргизүүнү чечти. Бул толугу менен мыйзамдуу жана зарыл. Бул кадам Кытай өкмөтүнүн улуттук кызыкчылыктарын коргоо жаатындагы чечкиндүүлүгүн көрсөтөт», - деди Кытайдын Тышкы иштер министрлигинин басма сөз катчысы Хуа Чунин.

20-январдын кечинде Байдендин администрациясы Кытайдын бул кадамын сынга алды. Бээжин менен Вашингтондун алакасы соңку жылдары начарлап кеткен. Ага кошумча Трамп коронавирусту «кытай вирусу» деп атаганы да ортодогу чыңалуунун күчөшүнө түрткү болгон.

АКШнын мурдагы президенти Дональд Трамптын администрациясы Бээжиндин Тайвань, Тибет, Гонконг, Түштүк-Кытай деңизинде жана Шинжаңда жүргүзгөн саясаты үчүн Кытайга каршы санкция киргизген.

Ал эми 19-январда мурдагы мамлекеттик катчы Майк Помпео Кытайдын Шинжаңдагы мусулман азчылыктарына жасаган мамилесин сынга алып, аны «геноцидге жана адамзатка каршы кылмышка» теңеген.

Мамлекеттик департаменттин башчылыгына келгени жаткан Энтони Блинкен Помпеонун чечимин колдой турганын айтып, жаңы администрация да Кытайга карата катаал позицияны карманарын билдирди. Анткен менен ал жаңы лидер эл аралык кызматташууну жакшыртканга аракет кыларын да кошумчалады.

Кытайдын «кара тизмесине» Трамптын улуттук коопсуздук боюнча мурдагы кеңешчилери Роберт О Брайен менен Жон Болтон, саламаттык сактоо министри Алекс Азар, Бириккен Улуттар Уюмундагы АКШнын элчиси Келли Крафт жана Трамптын мурдагы жардамчысы Стив Бэннон да кирди.

Буга чейин Иран Трампка, Помпеого жана администрациянын бир нече мүчөсүнө санкция салган. Иран менен АКШнын ортосундагы алакалар 2018-жылдан тартып курчуп кеткен. Ошол жылы майда Вашингтон Тегеран менен алты дүйнөлүк алты державанын ортосунда түзүлгөн өзөктүк келишимден чыгып кеткен.

Пикирлерди көрүңүз (1)

«Азаттыктын» материалдарына пикир калтырууда төмөнкү эрежелерди так сактоону өтүнөбүз: кайсы бир саясий партияга, топко үгүттөгөн, же каралаган, бир нече жолу кайталап жиберилген, адамдын беделине шек келтирген, келекелеген, кордогон, коркутуп-үркүткөн, басмырлаган жана жек көрүүнү козуткан пикирлер жарыяланбайт. Эрежени сактабай жазылган пикирлер сайтка чыкпайт. Модератор пикирлерди жарыялоо же андан баш тартуу укугун өзүнө калтырат.
Бул шерине жабылды, эми талкуу "Фейсбуктагы" барагыбызда (Azattyk.unalgysy) уланат.

XS
SM
MD
LG