Бүгүн, 24-январда Бишкекте кезектеги "Мыйзамдуулук үчүн!" тынчтык маршы болуп өттү. Уюштуруучулар "Азаттык" радиосуна билдиришкендей, акцияга отуздай адам катышты. Алар Темир жол вокзалынын алдына чогулуп, жүрүшүн адаттагыдай эле Ала-Тоо аянтынан жыйынтыкташты.
Акцияда Кыргызстанда коррупциянын жоюлушу, мыйзамдуулуктун орношу тууралуу талаптар коюлуп, Орусиядагы соңку митингдерди колдогон ураандар да айтылды.
"Баштан башта" кыймылы демилге кылган "Мыйзамдуулук үчүн!" тынчтык марштары 2020-жылдын ноябрынан бери ар жекшемби сайын уюштурулуп келе жатат. (RK)
