Линктер

ЧУКУЛ КАБАР!
1-Март, 2021 дүйшөмбү, Бишкек убактысы 02:00

Бийликти басып алууга айыпталып соттолгон эксперт Карыбековдун өкүмү жокко чыгарылды


Эрнест Карыбеков. Архивдик сүрөт.

Энергетика маселелери боюнча эксперт Эрнест Карыбековго карата чыккан бардык сот өкүмдөрү жокко чыгарылды, ага карата козголгон кылмыш иши Бишкектин Биринчи май райондук сотуна кайра кароого жөнөтүлдү. 3-февралда Жогорку сотто ушундай чечим чыкканын мекеменин басма сөз кызматы кабарлады.

Мекеменин маалыматына караганда, ишти башка судьялар карайт.

Ишти жаңы ачылган жагдайларга байланыштуу кайра кароо тууралуу өтүнүч менен Жогорку сотко Карыбековдун адвокаты кайрылган.

Эрнест Карыбеков саясатчылар Бектур Асанов жана Кубанычбек Кадыров менен кошо 2016-жылдын март айында «бийликти басып алууга аракеттенген» деген айып менен кармалган. Асанов менен Кадыров сегиз жылга, Карыбеков 14 жылга кесилген. Аларга байланышы бар деп кармалган мурдагы мамлекеттик катчы Дастан Сарыгулов төрт жылга шарттуу түрдө эркинен ажыратылган.

2019-жылы Жогорку сот Карыбековдун өтүнүчүн карап, жаза мөөнөтүн 14 жылдан 11 жылга түшүргөн, кийин ал жатак абакка которулган. Кадыров менен Асановдун жаза мөөнөтү жаңы мыйзамдарга ылайык каралып, алар шарттуу түрдө мөөнөтүнөн мурда эркиндикке чыгышкан.

2020-жылдын октябрында «Саясий туткундарды коргоо комитети» ошол кездеги президенттин милдетин аткаруучу, премьер-министр Садыр Жапаровго кайрылып, мурдагы президент Алмазбек Атамбаевдин тушунда анын режимине каршы чыккан саясатчыларга куугунтук болуп, түрмөгө камалганын белгилешкен. Куугунтукка кабылды дегендердин арасында Карыбековдун да аты аталган.(RK)

Пикирлерди көрүңүз (2)

«Азаттыктын» материалдарына пикир калтырууда төмөнкү эрежелерди так сактоону өтүнөбүз: кайсы бир саясий партияга, топко үгүттөгөн, же каралаган, бир нече жолу кайталап жиберилген, адамдын беделине шек келтирген, келекелеген, кордогон, коркутуп-үркүткөн, басмырлаган жана жек көрүүнү козуткан пикирлер жарыяланбайт. Эрежени сактабай жазылган пикирлер сайтка чыкпайт. Модератор пикирлерди жарыялоо же андан баш тартуу укугун өзүнө калтырат.

XS
SM
MD
LG