Линктер

ЧУКУЛ КАБАР!
18-Апрель, 2024-жыл, бейшемби, Бишкек убактысы 08:27

Ниязов менен Сагымбаевдин бөгөт чарасынын мөөнөтү эки айга узартылды


Фарид Ниязов. Архивдик сүрөт.
Фарид Ниязов. Архивдик сүрөт.

Мурдагы президент Алмазбек Атамбаевдин кеңешчиси болуп иштеген Фарид Ниязовдун жана жансакчысы Канатбек Сагымбаевдин 2020-жылдын 9-октябрындагы окуялар боюнча бөгөт чарасы өзгөрүүсүз калтырылып, мөөнөтү узартылды.

Бул тууралуу 5-февралда “Азаттык” радиосуна алардын адвокаты Замир Жоошев билдирди. Анын айтымында, маселе Биринчи май райондук сотунда каралып, Ниязовдун бөгөт чарасы өзүн катыштырбастан каралды:

“Эки айга узартылды. Ниязовду өзүн №1 тергөө абагынан алып келишкен жок. Коронавируска байланыштуу чыкпайт дешти. Бирок бул жөн гана шылтоо. Себеби мурдагы күнү эле аны Кой-Таш окуясы боюнча сотко алып келишкен. Канат Сагымбаев да уюштуруучу катары шектелип жатат. Анын бөгөт чарасы каралып, үй камагы эки айга узартылды».

Ниязов менен Сагымбаевдин бөгөт чарасынын мөөнөтү 10-апрелге чейин узартылды.

2020-жылдын 4-октябрында Кыргызстанда кезектеги парламенттик шайлоо өткөн. Анын эртеси нааразылык акциясы уюштурулуп, 6-октябрга караган түнү өлкөдө бийлик алмашкан. Акциялар уланып, 9-октябрда Бишкектин Ала-Тоо аянтында митинг өткөн. Аны уюштурууга шектүүлөр кармалган. Милиция Ала-Тоо аянтындагы таш, бөтөлкө ыргытуу, ок атуу менен коштолгон жаңжал боюнча иш козголгонун маалымдаган. Тергөөнү Ички иштер министрлиги жүргүзүүдө.

Ниязов Бишкектин №1 тергөө абагында отурат. Сагымбаев кийин үй камагына чыгарылган. Алар 2019-жылдагы Кой-Таш окуясы боюнча да соттолууда. (RK)

XS
SM
MD
LG