Бишкекте бир мектеп коронавируска байланыштуу убактылуу жабылды. Бул тууралуу 24-февралда "Азаттык" радиосуна борбор калаанын билим берүү башкармалыгынын басма сөз катчысы Мээрим Халиалдаева билдирди.
Анын айтымында, эки апталык карантинге №70 гимназия мектеби жабылды:
"14 күнгө. 19-февралдан баштап".
Маалыматка караганда, мектепти жаба турууну Санитардык-эпидемиологиялык көзөмөл мекемеси сунуш кылган. Буга эки окуучудан жана эки мугалимден коронавирус аныкталганы себеп болгон.
Бишкекте коронавируска байланыштуу 2020-жылдын март айында жабылган мектептер толук ачыла элек. Азыр 1, 5, 9 жана 11-класстын гана окуучулары кадимки тартипте окуп жатышат, калган класстар аралыктан окууну улантууда. Бул илдеттен Кыргызстанда 1,5 миңдей адам каза болду, оору жугузуп алгандар 90 миңге чамалады. (RK)
