Линктер

ЧУКУЛ КАБАР!
28-Сентябрь, 2021 шейшемби, Бишкек убактысы 02:39

Орусия менен Кытайдын тышкы иштер министрлери биргелешкен билдирүү жасады


Орусиянын тышкы иштер министри Сергей Лавров жана Кытайдын башкы дипломаты Ван И

Батыштын санкцияларына кабылган Кытай менен Орусиянын тышкы иштер министрлери Бээжиндеги жолугушууда БУУнун Коопсуздук кеңешинин туруктуу мүчөлөрүн саммит өткөрүүгө чакырышты. Ван И менен Сергей Лавров 23-мартта Кытай башкалаасында өткөн биргелешкен пресс-конференцияда Батыш өлкөлөрүнүн сынын четке кагышты.

Министрлер Москва жана Бээжиндин көз карашында АКШ "кансыз согуш" доорундагыдай саясий альянстарга таянып, эл аралык укуктук түзүлүштү жок кылууга аракет кылууда деп билдирди. Министрлер алардын ички иштерине кийлигишүү болуп жатканын айтып, “демократиялык моделдин жалгыз бир стандарты жок” деп биргелешкен билдирүүдө белгилешти.

Ван И Европа Биримдиги, Британия, Канада жана АКШнын Шинжаңдагы мусулмандардын укуктарын бузуу үчүн кытай аткаминерлерин бутага алган санкцияларын катуу сындады.

Эки өлкөнүн башкы дипломаттары адегенде дүйшөмбүдө Кытайдын түштүгүндөгү Наннинг шаарында кездешти. Жолугушууда министрлер башка өлкөлөрдүн ички иштерине аралашып жатат деп Вашингтонду айыпташты жана АКШны Ирандын ядролук программасы боюнча эл аралык келишимге кайтууга үндөштү.

2018-жылы мурдагы президент Доналд Трамп сөз болгон келишимден чыгып кеткен. Кытай менен Орусия 2015-жылы жетишилген документке кол койгон жети мамлекеттин катарына киришет. Бул эки өлкө тең Иран менен тыгыз кызматташат. “Бир тараптуу санкцияларга каршы турушубуз керек”, -деп айтты Ван И.

Анын бул комментарийи алдында Кытай жооп иретинде Еврошаркеттин 10 өкүлүнө жана төрт компанияга каршы санкция салынарын жарыялаган. Бул Брюсселдин соңку 30 жылдагы Кытайга карата алгачкы санкциясы болуп калды.

Батыш өлкөлөрү Кытайга карата Шиңжаңдагы түпкүлүктүү улуттарга карата куугунтукту сындап келе жатат. Буга чейин АКШ, Канада сыяктуу өлкөлөр муну "геноцид" деп атаган болчу. Ал эми Орусияга Крымды аннексиялашы, Донбасстагы согуш, АКШдагы шайлоого ыктымал кийлигишүүсү жана Алексей Навальный баш болгон оппозициячыл саясатчылардын өмүрүнө кол салып, куугунтуктоого байланыштуу алака начарлап, санкциялар киргизилген.

Пикирлерди көрүңүз (2)

«Азаттыктын» материалдарына пикир калтырууда төмөнкү эрежелерди так сактоону өтүнөбүз: кайсы бир саясий партияга, топко үгүттөгөн, же каралаган, бир нече жолу кайталап жиберилген, адамдын беделине шек келтирген, келекелеген, кордогон, коркутуп-үркүткөн, басмырлаган жана жек көрүүнү козуткан пикирлер жарыяланбайт. Эрежени сактабай жазылган пикирлер сайтка чыкпайт. Модератор пикирлерди жарыялоо же андан баш тартуу укугун өзүнө калтырат.
Бул шерине жабылды, эми талкуу "Фейсбуктагы" барагыбызда (Azattyk.unalgysy) уланат.

XS
SM
MD
LG