Линктер

ЧУКУЛ КАБАР!
19-Сентябрь, 2021 жекшемби, Бишкек убактысы 03:22

Сыймык Жапыкеев Ысык-Көл облусунун прокурору болуп дайындалды


Сыймык Жапыкеев.

Өкмөттүн буйругу менен жоюлган Финансы полициясынын мурдагы жетекчиси Сыймык Жапыкеев Ысык-Көл облусунун прокурору болуп дайындалды.

Тиешелүү буйрукка башкы прокурор Курманкул Зулушев 30-мартта кол койду. Маалыматты Башкы прокуратуранын басма сөз кызматы "Азаттыкка" ырастады.

Буга чейин Зулушевдин Жапыкеев тууралуу буйругунун көчүрмөсү интернетте тараган.

Быйыл февралда премьер-министрлик кызматка Улукбек Марипов келгенде өкмөттүн курамындагы мекемелер 48ден 16га азайтылган. Анын ичинде октябрь айындагы митингдин модераторлорунун бири болгон Сыймык Жапыкеев жетектеген Экономикалык кылмыштарга каршы күрөшүү боюнча мамлекеттик кызмат (Финансы полициясы) жоюлган.

Жапыкеев бул орунга 2020-жылдын октябрь окуяларынан кийин келген болчу.

Марттын этегинде ал президент Садыр Жапаровдун жарлыгы менен «Финансы полициясынын генерал-майору» деген жогорку наам алганын жарыялаган. Президенттин маалымат кызматы бул тууралуу расмий кабарлаган эмес. Коомдук талкуудан кийин мамлекеттик органдардын кызматкерлерине бериле турган чиндердин жана атайын наамдардын тизмесинде Сыймык Жапыкеев бар экенин бышыктаган.

Жапыкеев былтыркы октябрь окуяларынан кийин бир нече күн Башкы прокуратурага кирип, мекемени жетектөөгө аракет кылган. Анын жана Башкы прокуратура кызматкерлеринин ортосунда тирешүү болгону кабарланган.

Былтыр 4-октябрда Кыргызстанда кезектеги парламенттик шайлоо өткөн. Анын баштапкы жыйынтыгына нааразы болгон ондон ашык саясий партия Бишкекте митинг уюштуруп, акция башаламандык менен аяктаган жана өлкөдө бийлик күтүүсүздөн алмашкан.

Сыймык Жапыкеев бийлик алмашканга чейин азыркы президент Садыр Жапаровду колдоп жүргөн. (NT)

Пикирлерди көрүңүз (6)

«Азаттыктын» материалдарына пикир калтырууда төмөнкү эрежелерди так сактоону өтүнөбүз: кайсы бир саясий партияга, топко үгүттөгөн, же каралаган, бир нече жолу кайталап жиберилген, адамдын беделине шек келтирген, келекелеген, кордогон, коркутуп-үркүткөн, басмырлаган жана жек көрүүнү козуткан пикирлер жарыяланбайт. Эрежени сактабай жазылган пикирлер сайтка чыкпайт. Модератор пикирлерди жарыялоо же андан баш тартуу укугун өзүнө калтырат.
Бул шерине жабылды, эми талкуу "Фейсбуктагы" барагыбызда (Azattyk.unalgysy) уланат.

XS
SM
MD
LG