Линктер

ЧУКУЛ КАБАР!
17-Май, 2021 дүйшөмбү, Бишкек убактысы 02:46

Кубанычбек Жумалиевдин мандаты Аманкул Токтомамбетовго берилди


Жогорку Кеңештин депутатынын күбөлүгү жана эн-белгиси.

Борбордук шайлоо комиссиясы (БШК) 21-апрелдеги отурумунда Жогорку Кеңештин «Бир Бол» фракциясындагы бошогон депутаттык мандатты партиянын тизмесиндеги кийинки талапкер Аманкул Токтомамбетовго тапшыруу чечимин кабыл алды. Токтомдун долбооруна БШКнын жыйынга катышып жаткан 11 мүчөсүнүн ону макул болду, бирөө каршы чыкты.

Алтынчы чакырылышка жарышка түшкөн «Бир Бол» партиясынын 2015-жылкы тизмесинде Аманкул Токтомамбетов 26-катарда турчу.

БШК ушул эле күнкү отурумунун башында парламенттеги «Бир Бол» фракциясынын депутаты Кубанычбек Жумалиевдин ыйгарым укуктарын мөөнөтүнөн мурда токтоткон. Баяндамачы, шайлоолорду уюштуруу бөлүмүнүн башчысы Төлөгөн Айтикеев жыйында Жумалиев мандатын тапшыруу арызын өз ыктыяры менен 13-апрелде тапшырганын маалымдады. Ыйгарым укуктарын токтотуунун себептери айтылган эмес.

Мурдагы премьер-министр, ошол кездеги депутат Кубанычбек Жумалиевди Улуттук коопсуздук боюнча мамлекеттик комитет (УКМК) 4-февралда Жазык кодексинин 319-беренеси («Коррупция») боюнча айыптап, камакка алган.

Ал март айынын башында кан басымына жана жүрөк оорусуна байланыштуу Бишкектеги менчик ооруканага жатканы кабарланган. Жумалиев Бишкектеги «Бикард» жеке менчик ооруканасынан УКМКнын тергөө абагына кайтканын атайын кызмат 29-мартта билдирген. Ал мамлекетке 1 млрд. сом төлөп берип, эч кайда кетпөө тилкаты менен 12-апрелде бошотулган.

Кубанычбек Жумалиев Эл аралык медициналык университетке лицензия алуу, ошондой эле кылмыштуу жол менен табылган кирешени легалдаштыруу, салык жашыруу, мыйзамсыз баюу боюнча айыпталып жаткан. (ErN)

Facebook шеринеси

XS
SM
MD
LG