Кыргыз өкмөтү 10-май - кадимкидей иш күнү экенин билдирди. Буга чейин 9-май жекшембиге туш келгендиктен, 10-майда эс алуу болору айтылган эле.
Адатта Кыргызстанда майрам жекшембиге туш келсе, анын эртеси эс алуу күнү жарыяланат. Бул ирет кыргызстандыктар 10-майдын эсебинен 30-августта - Эгемендик майрамынын алдында эс алышат.
Май - Кыргызстанда майрамдар эң көп болгон ай. 1-май - Эмгекчилердин тилектештигинин күнү, 5-май - Конституция күнү, 9-май - Жеңиш майрамы. Бул жылы Орозо айт майрамы да 13 же 14-майга туш келүүдө.
