Өзбекстандагы президенттик шайлоо күнү Кыргызстанда алты добушкана иштейт. Анын төртөө Ош шаарында, бири Жалал-Абад шаарында, дагы бири Бишкекте ачылат.
Өзбекстандын Кыргызстандагы элчилигинен кабарлашкандай, Оштогу шайлоо тилкелери Кыргыз-өзбек университетинде, Ош мамлекеттик университетинин Медицина факультетинин имаратында, Ош мамлекеттик гуманитардык педагогика университетинде, Ош мамлекеттик технология университетинде ачылат.
Жалал-Абад мамлекеттик университетинин Медицина факультетинде жана Бишкекте элчиликтин имаратында да добушканалар иштейт.
Өзбекстанда президенттик шайлоо 24-октябрда болот. Мамлекетти башкарууга талапкер болгон беш кишинин арасында азыркы президент Шавкат Мирзиёев да бар.
Буга чейин Өзбекстандагы шайлоолордо Кыргызстандын бир гана жеринде - Бишкектеги элчиликте добушкана иштеп келген.
2017-жылы кыргыз-өзбек чек арасындагы чектөөлөрдүн алынышы менен Өзбекстандан Кыргызстанга иштегени келген мигранттардын саны көбөйгөн.
Facebook шеринеси