Кыргызстандын Орусиядагы элчилиги мигранттар арасынан курултайга делегат шайлоо камылгасы башталганын билдирди.
“Курултайга делегаттарды тандоого Орусияда каттоодон өткөн мигранттардын коомдук уюмдары катыша алат. Ар бир коомдук уюмдан бирден делегат шайланат”, - деп айтылат маалыматта.
Курултайга жалпысынан миң делегат катышат жана анын ичинен 28 адам чет өлкөдө жүргөн мигранттар арасынан тандалып келет.
Президент Садыр Жапаров 16-августта ушул жылдын 25-ноябрында элдик курултайды чакыруу тууралуу жарлыкка кол койгон жана жол-жобосу бекиген.
Ал "курултайда бийликтин бардык бутактары элге отчет берерин жана бийлик делегат тандоого кийлигишпей турганын" билдирген.
Элдик курултай институту былтыр 5-майдан тартып күчүнө кирген Конституцияда жазылган. Ага ылайык, ушул жылдын 1-сентябрына чейин атайын мыйзам кабыл алынып, курултай жыл аягына чейин жыйынга чогулушу керек болчу. Бирок мыйзам убагында кабыл алынбай калган. Айрым депутаттар бул иш-чара президенттин жарлыгы менен чакырылып жатышын мыйзамсыз деп аташкан.
Элдик курултай институту тууралуу берене 2010-жылы кабыл алынган Баш мыйзамда да бар эле. Анда курултай жөнүндө конституциялык мыйзам жазылып, бирок кабыл алынбай калган.
Facebook шеринеси