17-январдан тарта Жалал-Абад, Талас, Чүй облустарындагы бир катар мектептер онлайн окутууга өтүп, айрым бала бакчалар убактылуу жабылды. Бул тууралуу Билим берүү жана илим министрлиги сайтында кабарлады.
Мекеме мындай чечим Санитардык-эпидемиологиялык көзөмөлдөө органдарынын санитардык көрсөтмөлөрүнө ылайык кабыл алынганын билдирдик.
Министрликтин маалыматына караганда, Жалал-Абад шаарындагы мамлекеттик мектептер, Көк-Жаңгак шаарындагы мектептер, Таш-Көмүр шаарындагы 6 мектеп, Талас облусунун Бакай-Ата районундагы 1 мектеп жана 1 мектептин 2-корпусу, Чүй облусунун Жайыл районундагы 11 мектеп аралыктан окутууга өттү.
Кара-Көл шаарындагы 2, Таш-Көмүр шаарындагы 3, Бакай-Ата районундагы 1 жана Жайыл районундагы 5 бала бакча жабылды.
Мурдараак Нарын облусундагы Ат-Башы районундагы бардык мектептер суукка байланыштуу онлайн окутууга өткөнү кабарланган. Майлуу-Суу шаарындагы окуучулар да калаадагы өзгөчө режимге байланыштуу аралыктан билим алып жатышат.
Кыргызстанда катуу сууктан улам сасык тумоо кайрадан көбөйө баштаганын 16-январда Ооруларды алдын алуу жана мамлекеттик санитардык-эпидемиологиялык көзөмөл департаментинен билдиришкен. (ErN)
Facebook шеринеси