Чүйдүн Жайыл районундагы Бишкек-Ош автоунаа жолунда кар көчкүнү атып түшүрүү иштери бүгүн, 20-февралда дагы уланат. Бул тууралуу Өзгөчө кырдаалдар министрлиги (ӨКМ) билдирди. Министрлик жолго чектөө киргизилери тууралуу кабарлаган жок.
Буга чейин Бишкек-Ош автоунаа жолундагы 197-чакырымында кар көчкүнү атып түшүрүү иштерине байланыштуу убактылуу чектөө киргизилген. Жол саат 19:00дө ачылган.
Транспорт жана коммуникация министрилиги 19-февралда саат 18.30га алынган ыкчам маалымат боюнча Бишкек-Нарын-Торугарт автоунаа жолундагы Кара-Үңкүр участкасында 10 миң куб кар көчкүсү атып түшүрүлүп, тазалоо иштери жүргүзүлгөн. Министрлик жол каттамы убактылуу ачылып, 20-февралда кар көчкүнүнү атып түшүрүү иштерине байланыштуу кайра жабыларын кабарлады.
Кыргызгидромет борбору 16-19-февралга чейин күтүлүп жаткан жаан-чачынга байланыштуу тоолуу райондордо кар көчкү түшүү ыктымалдыгын кабарлаган. Өткөн аптада тоолуу аймактарда калың кар түштү. ӨКМ кооптуу аймакта жашаган жарандарга эскертүү берүүдө. (TSh)
