Линктер

ЧУКУЛ КАБАР!
24-Май, 2024-жыл, жума, Бишкек убактысы 09:27

Эки жыл мурун киши колдуу болгон Айзада тууралуу тасманын бет ачары өттү


"Кийинкиси ким?" тасмасынын бетачары "Ала-Тоо" кинотеатрында өттү.
"Кийинкиси ким?" тасмасынын бетачары "Ала-Тоо" кинотеатрында өттү.

Бишкекте эки жыл мурун киши колдуу болгон Айзада Канатбекованын трагедиялуу тагдыры тууралуу тасманын бет ачары өттү.

"Кийинкиси ким?" ("Who is next?") деп аталган бир сааттык даректүү тасманы тартууга "Сорос-Кыргызстан" фонду каржылык жардам көрсөткөн.

Фильмдин режиссёрлору – Нуржамал Карамолдоева жана Султан Усувалиев, көркөм жетекчиси Актан Арым Кубат.

Кыргыз жана орус тилдеринде англисче субтитр коштогон тасманын бет ачарына Айзаданын жакындары, адвокаттары, жарандык коомдун өкүлдөрү, укук коргоочулар, журналисттер, активисттер катышты.

Маркум Айзада Канатбекованын апасы.
Маркум Айзада Канатбекованын апасы.

Тасмада адам уурдоого кабылган кыздын тагдыры аркылуу бул кылмыштуу жоруктун кесепеттери баяндалган. Анда тергөөнүн шалаакылыгы да көрсөтүлгөн.

2021-жылдын 5-апрелинде Бишкекте 27 жаштагы Айзада Канатбекованы үч адам күчтөп машинеге салып кеткен. Эки күндөн кийин кыздын жана аны уурдаган Замирбек Теңизбаевдин сөөгү талаадан табылган. Кыздын өлүмү боюнча иш кийин токтотулган, буга ага кол салган Теңизбаев өзүн өзү өлтүргөнү себеп болгон. Ал эми аны уурдоого катышкан беш киши 6,5-7 жылга кесилген.

Милиция кызматкерлерине “Шалаакылык” деген берене менен иш козголгон. Ички иштер министрлиги 12 кызматкер кызматтан алынганын, 27сине эскертүү берилгенин жана бешөөнө сөгүш жарыяланганын маалымдаган.

Милиция кызматкерлерине козголгон иштин тергелиши боюнча маселе сотто каралмай болгонун 28-декабрда “Азаттык” радиосуна жабыркаган тараптын адвокаты Нурбек Токтакунов билдирген.(MZh)

Facebook шеринеси

XS
SM
MD
LG