Украинанын Донецк облусундагы оккупацияланган Енакиево шаарынын үстүнөн 3-мартта аскердик учак атып түшүрүлдү. Анын кулаганы тартылган видео "Протесты в мире" Телеграм-каналына жарыяланды.
Енакиево ушул тушта катуу салгылашалуу болуп жаткан аймактардан салыштырмалуу алыс. Орусия дайындаган шаар башчысы Роман Храменков тургундарды көчөгө чыкпоого, мүмкүн болсо баш калкалоочу жайларга барууга чакырды.
"РБК-Украина" атып түшүрүлгөн учак орусиялык Су-34 экенин Украинанын Аскер-аба күчтөрүнүн жетекчилигине таянып билдирди. Аталган орган аны украиналык зениттик аткычтар бутага алганын, учкучтардын бири каза болгонун ырастоодо.
Орусиянын Коргоо министрлиги окуяга комментарий бере элек. Бирок мекеменин 3-марттагы маалыматында Орусиянын Аэрокосмикалык күчтөрү Донецк облусундагы Красноармейск шаарына жакын жерде Украинанын Су-24 учагын атып түшүргөнү айтылат. Красноармейск менен Енакиево болжол менен 100 километр аралыкта жайгашкан.
