Бишкекте Кожомкул атындагы спорт ордосунда Советтер Союзунун баатыры Дүйшөнкул Шопоковдун элесине арналган эл аралык бокс мелдеши аяктады.
21-мартта башталган таймаштарга Кыргызстан, Монголия, Беларус, Түштүк Корея, Өзбекстан жана Казакстандан 140тай спортчу катышты. 25-марттагы финалдын жыйынтыгында төмөндөгү спортчулар чемпион аталды.
48 кг - Йаухени Кармельчук, Беларус
51 кг - Кенже Муратулы, Казакстан
54 кг - Санжар Сейдакматов, Кыргызстан
57 кг - Ислам Төрөбаев, Кыргызстан
60 кг - Миркомил Саитохунов, Өзбекстан
63.5 кг - Жантөрө Ташиев, Кыргызстан
67 кг - Жавлонбек Юлдошев, Өзбекстан
71 кг - Элдар Турдубаев, Кыргызстан
75 кг - Данияр Дамирдин уулу, Кыргызстан
80 кг - Алексей Альферов, Беларус
86 кг - Эркин Адылбек уулу, Кыргызстан
92 кг - Владислав Смяхликов, Беларус
+92 кг - Бекнур Кхали, Монголия
Шопоковдун элесине арналган бокс боюнча эл аралык мелдештин байге фонду 40 миң доллар. Байге фондун Эл аралык бокс федерациясынын президенти (IBA) Умар Кремлев каржылаган. Мушкерлер 1-орун үчүн 1400 доллар, 2-орун үчүн 700 доллар, 3-4-орун үчүн 500 доллар акчалай сыйлык алышты.
Дүйшөнкул Шопоков атындагы эл аралык таймаш быйыл 45-жолу өткөрүлүп жатат.
Дүйшөнкул Шопоков 1915-жылы 19-майда Чүй облусунун Шалта айылында туулган. Улуу Ата Мекендик согуш башталганда Дүйшөнкул Шопоков майданга аттанып, 316-аткычтар дивизиясына кабыл алынган. 28 панфиловчунун катарында Волоколамск районунун аймагында Москваны коргогон. 1941-жылы 16-ноябрда Дубосеково кесилишиндеги кармашта курман болгон. 1942-жылы Дүйшөнкул Шопоковго Советтер Союзунун Баатыры наамы ыйгарылган. (TSh)
