Кошмо Штаттарынын Коргоо министрлиги кассеталык ок-дарылар Украинага жеткирилгенин ырастады.
Пентагондогу штабдардын биргелешкен комитеттеринин өкүлү Дуглас Симс 13-июлда брифингде мындай ок-дарынын теңин АКШ, калган бөлүгүн өнөктөштөрү бергенин маалымдады.
Ал Bloomberg басылмасынын кабарчысынын суроосуна жооп берип жатып Киев кассеталык бомбаларды жайкын тургундар жашаган аймакка жакын колдонууга кызыкдар эместигин белгиледи.
"Украиналыктар орусиялыктардын айырмаланып кассеталык ок-дарыны эл жашаган аймакка жакын жерде колдонууга кызыкдар деп ойлобойм. Алар кассеталык ок-дары мээлеген бутага тийбей калышы ыктымалдыгын да билишет жана түшүнүшөт", - деди Дуглас.
Өткөн аптада Вашингтон Киевге бериле турган баасы 800 миллион долларлык кезектеги жардамдын алкагында кассеталык ок-дары жөнөтөрүн расмий бышыктаган. Коргоо министринин орун басары Колин Каль Киев мындай ок-дарынын колдонулушу тууралуу АКШга такай отчет берип турарын, өз эли үчүн тобокелдикти азайтуу максатында өз аймагында гана колдонуу тууралуу милдеттеме алганын белгилеген.
Президент Жо Байдендин кеңешчиси Жейк Салливан “Орусия Украинага каршы согуш ачкандан тартып эле кластердик бомбаларды колдонгонун, Украина өз аймагын коргош үчүн ушундай куралга муктаж экенин” айткан.
АКШнын бир катар өнөктөштөрү Украинага кассеталык ок-дары жөнөтүүгө каршы чыккан.
Орусиянын коргоо министри Сергей Шойгу эгер Украинага кассеталык ок-дары берилсе, орус армиясы дагы мындай бомбаларды колдоно баштай турганын эскерткен. Ал муну "аргасыз чара" жана Киевге "жооп" катары сыпаттап, ушул кезде Москва "кассеталык ок-дарыны колдонуудан карманып келе жатканын" айткан.
Украинанын бийлиги Орусия согуш баштагандан бери бир канча жолу кассеталык бомба колдонгонун билдирип келет. Москва болсо дооматты такай четке кагууда.
Кассеталык дүрмөттөр асманда жарылып, майда бөлүкчөлөрдү узакка чачыратат. Андан өтө көп жайкын тургундар кырылып калышы ыктымал деген кооптонуу бар. Бомбанын майда бөлүкчөлөрү аткылоо учурунда жарылбай, кийин жарылышы мүмкүн жана ал жер-суунун баарын мина талаасына айлантууга жөндөмдүү.
Дүйнөдө кассеталык бомбаларды колдонууга тыюу салуу конвенциясы 2010-жылдан бери күчүнө кирген. Ага 100дөн ашык мамлекет кол койгон, бирок Орусия да, Украина да кошулган эмес.
