Линктер

ЧУКУЛ КАБАР!
12-Июнь, 2024-жыл, шаршемби, Бишкек убактысы 20:29

УКМК Ат-Башыда "Йакын инкардын" мүчөлөрү кармалганын маалымдады


Йакын-Инкарчылардын үйүнөн алынган адабияттар. УКМК тараткан сүрөт.
Йакын-Инкарчылардын үйүнөн алынган адабияттар. УКМК тараткан сүрөт.

Улуттук коопсуздук боюнча мамлекеттик комитетинин (УКМК) Нарын облустук ички иштер башкармалыгы (ОИИБ) менен чогуу Ат-Башы районунда “Йакын инкар” диний-экстремисттик агымынын тогуз мүчөсү жашаган жерлерде тинтүү иштерин жүргүздү.

Жыйынтыгында “Йакын инкар” диний-экстремисттик агымына тиешелүү көптөгөн экстремисттик мүнөздөгү китептер, дептерлер жана журналдар, ошондой эле электрондук ноутбуктар, флешкалар жана телефондор табылды. Алынган материалдар боюнча соттук экспертизалар дайындалды.

Жүргүзүлгөн ыкчам-иликтөө иш-чараларынын негизинде “Йакын инкар” диний-экстремисттик агымынын 9 мүчөсү кармалып, Нарын ОИИБнин убактылуу кармоочу жайына киргизилди.

УКМКнын маалымат кызматы уюмдун 3 мүчөсү аталган экстремисттик агымдын идеологиясынан баш тартканын кошумчалады.

“Йакын инкар” диний агымы – “Таблиги жамаат” уюмунун ичинен бөлүнүп чыккан өзүнчө топ. Анын мүчөлөрү өздөрүн “пайгамбардын жолун жолдоочуларбыз” деп эсептешет. Бул диний агым Кыргызстанда 2017-жылы экстремисттик деп табылган.

Мындан тышкары сот тарабынан 2003-жылдан бери баш-аягы 21 диний бирикменин ишмердигине террорчул жана экстремисттик уюм катары тыюу салынган. Ага “Жабхат ан-Нусра”, “Жайшул-Махди”, “Ансарул-Лах”, “Хизб ут-Тахрир ал-Ислами”, “Жихад тобу” жана “Чыгыш Түркстан Ислам кыймылы” сыяктуу эл аралык террордук жана экстремисттик уюмдар кирген. (ZKo)

Facebook шеринеси

XS
SM
MD
LG