Линктер

ЧУКУЛ КАБАР!
18-Май, 2021 шейшемби, Бишкек убактысы 00:41

Азизбек Келдибеков: Өкмөт тууралуу соңку азилдер


Кыргыздын азил-тамаша айтуу өнөрүн аздектеген калемгерлердин бири Азизбек Келдибеков “Күлкү кербенине” сунуштаган жаңы анекдоттордон бир шиңгил.


Кеңешип алсак...

Биринчи вице-премьер-министр өкмөт башчысынын иш бөлмөсүнө келип:
- Сизден бир кеңеш сурайын дедим эле, - дейт.
-И-и, - деп компоё түшөт премьер-министр.
- Шайлоодо элге чачкан миллиондорубузду кантип чогултуп алабыз? - дептир биринчи вице-премьер-министр.
- Ушуну «биттин ичегисине кан куйган» сиз билсеңиз керек, сизден үйрөнөйүн деп жүрбөймбү, - деген имиш премьер-министр.

Кыргыз сатирик-калемгери Азизбек Келдибеков - "Азаттыктын" азил-тамаша артынган "Күлкү кербенинин" окурманы. 2011-жылдын 6-январы.


* * * * *


Күзүндө добуш жыйымы болот

Премьер-министр биринчи вице-премьер-министрден сурап калат:
- Жазында го үрөн себет экенбиз, күзүндө эмне жыйнайбыз? - деп.
- Күзүндө президенттик шайлоого эл жыйнайбыз, - дептир шар эле биринчи вице-премьер-министр.

* * * * *

Иш билгилери канча?

Премьер-министр аппарат жетекчисин чакырып:
- Биздин аппаратта канча киши иштейт? - деп сурап калат.
- Ондон бири эле иштейт, калгандары тааныш аркылуу кызматка алынгандар, - дептир аппарат жетекчиси.

* * * * *

Тоок кырылгандагы идеялар

Премьер-министрге айыл чарба министри келип:
- Урматтуу өкмөт башчысы! Биздин өлкөдөгү тооктор кырыла баштады, - дейт.
- Эч нерсе эмес ар бир тооктун алдына буудайдын сүрөтүн тартып коюп койгула, - дейт премьер-министр.
Бир жумадан кийин айыл чарба министри кайра келет:
- Урматтуу өкмөт башчысы! Тооктор дагы эле кырылып атат, эмне кылабыз? - дейт.
- Буудайдын жанына арпанын сүрөтүн тартып койгула, - дейт.
Дагы бир жумадан кийин айыл чарба министри кайра келет:
- Урматтуу өкмөт башчысы, баары бир тооктор өлүп атышат.
- Буудай менен арпанын сүрөтүн алып жүгөрүнүн сүрөтүн тартып койгула, - дейт премьер-министр.
Бир жумадан кийин айыл чарба министри келип:
- Урматтуу өкмөт башчысы! Бүттү, тооктун баары кырылып бүттү, - дейт.
-Ка-ап! - деп премьер-министр аябай өкүнгөн экен. - Менде дагы жакшы идеялар бар эмес беле.


* * * * *

Кайрылчу дарек

Премьер-министр иш бөлмөсүндө өтө капалуу отурат. Тыякка тартса тыякка жетпейт, быякка тартса быякка жетпейт. Анысы аз келгенсип жазында калайык-калк кайрадан көтөрүлөбүз деп турат.
Аябай ачуусу келип отурса, иш бөлмөсүнүн эшигин тыкылдатып, кимдир бирөө кирип келип:
- Урматтуу премьер-министр, мен өкмөттө иштейин дедим эле, кимге кайрылсам болот? - деп калат.
- Психиатрга!!! - дептир премьер-министр ачуусу менен.


* * * * *

Кайсынысы тез келет?

Премьер-министрден журналисттер сурап калышат:
- Сиз жаңы жылды жакшы көрөсүзбү же шайлоону жакшы көрөсүзбү, - дешип.
- Албетте, шайлоону, - дептир премьер-министр.
- Эмнеге?
- Бизде жаңы жылга караганда шайлоолор тез-тез болуп турат эмеспи, - дептир премьер-министр.


* * * * *

Акбоз аттын такасы, демократиянын накасы

- Демократия деген эмне? - деп премьер-министрден сурап калышат.
- Бакиевди кубалап, ордуна бакиевчилерди алып келсек, нагыз демократия деген мына ушул, - дептир премьер-министр.



Азизбек Келдибеков
(«Азаттыктын» окурманы).

Пикирлерди көрүңүз (1)

«Азаттыктын» материалдарына пикир калтырууда төмөнкү эрежелерди так сактоону өтүнөбүз: кайсы бир саясий партияга, топко үгүттөгөн, же каралаган, бир нече жолу кайталап жиберилген, адамдын беделине шек келтирген, келекелеген, кордогон, коркутуп-үркүткөн, басмырлаган жана жек көрүүнү козуткан пикирлер жарыяланбайт. Эрежени сактабай жазылган пикирлер сайтка чыкпайт. Модератор пикирлерди жарыялоо же андан баш тартуу укугун өзүнө калтырат.
Бул шерине жабылды, эми талкуу "Фейсбуктагы" барагыбызда (Azattyk.unalgysy) уланат.
XS
SM
MD
LG