Линктер

ЧУКУЛ КАБАР!
8-Декабрь, 2021 шаршемби, Бишкек убактысы 04:17

Мидикең Биринчи катчы Исхак Раззаковго "каяша" айтканда


Кыргыздын чыгаан сатириктеринин бири Мидин Алыбаевдин (1917-1959) Кыргызстан Компартиясынын Биринчи катчысы Исхак Раззаковдун кабылдоосундагы сөзү тууралуу маркум Амантур Акматалиевдин эскерүүсү.


...1953-жылдын март айлары чени.

“Мидин Нарынга келиптир” деп уктук.

Мугалимдер институтунун үч-төрт студенти “Тянь-Шань правдасы” гезитинин редакциясына келдик.

Тегерек тарткан топ кыраан каткы күлкүгө баткан.

Башында эскилиги жеткен кара тумак, эски тыбыт моюнорооч, кара чокой, көзүнүн алды шишимек тартып, ортодо Мидин сайрап турат.

- Күндөрдүн биринде Райкан (Райкан Шүкүрбеков, 1913-1964. – ред.) экөөбүздү Борбордук Комитет чакырып калды. Ээрчишип жөнөдүк.

Экөөбүздүн кылык-жоругубуз эчак эле белгилүү болуптур.

Биринчи (катчынын) алдында маалымат жатат.

Жолдош Исхак Раззакович экөөбүздү алмак-салмак карап алды.

Карап туруп:
- Сиздер эл тааныган акындар болуп туруп, эмне үчүн аракты көп ичесиздер, жолдоштор? – деди.
- Жок, Исхак Раззакович! Биз вино гана ичебиз.
- Арак менен винонун айырмасы кайсы?
- Айырмасы жолдош Орозалиев менен Жакишовдой, - дедим эле, чоңдор күлүп калышты.

(Анда Керимкул Орозалиев өзү да отурган. Ал БКнын идеология боюнча катчысы, Жакишов – КыргызТАГдын бир өңүрүн жетектеген кызматкер эле. Бирөө өз атасынын, экинчиси – чоңатасынын атына катталып алган жакын туугандар экен).

Сырткы түрүбүзгө көз жүгүртүп алып:
- Көп ичет окшойсуңар? – деди Биринчи катчы.
- Жок, Исхак Раззакович! Аз эле ичебиз. 100 грамм. Анан өзү эле андан ары алып жүрүп кетет.
Кайрадан каткырык жаңырды.

- Үй-бүлөчүлүк да анча ынтымакта эмес ко? Үч аял кетирипсиз, ушул чынбы?
- Мен бир эле аял кетиргемин.
- Экөөнүчү?
- Экөө кайра мени кетирген, Исхак Раззакович!
Кайрадан жапырт күлүп калышты.


А.Акматалиев.

* * * * *

“Азаттыктын” Кыргызстандагы алгачкы жергиликтүү кабарчыларынын бири, журналист, этнограф, публицист Амантур Акматалиевдин (1934-2002) бул эскерүүсү Бекмырза Рахман уулу Жекембаевдин “Куйкум сөздүү куудулдар” жыйнагына (Бишкек, 2002, 64-65-беттер) жарыяланган.

Пикирлерди көрүңүз (2)

«Азаттыктын» материалдарына пикир калтырууда төмөнкү эрежелерди так сактоону өтүнөбүз: кайсы бир саясий партияга, топко үгүттөгөн, же каралаган, бир нече жолу кайталап жиберилген, адамдын беделине шек келтирген, келекелеген, кордогон, коркутуп-үркүткөн, басмырлаган жана жек көрүүнү козуткан пикирлер жарыяланбайт. Эрежени сактабай жазылган пикирлер сайтка чыкпайт. Модератор пикирлерди жарыялоо же андан баш тартуу укугун өзүнө калтырат.
Бул шерине жабылды, эми талкуу "Фейсбуктагы" барагыбызда (Azattyk.unalgysy) уланат.
XS
SM
MD
LG