Жалалабаддык Орозбү Маматованын ар жылда түшүм берген алмасы арзан сатылгандыктан башына үй бүтпөй, батирде отурат.
Орозбү Маматова нече жылдан бери бакты өстүрүп келаткан мээнети баркталбаганына нааразы. Бакты алар кеч күз менен эрте жазда сууга кандырышат. Анткени, багбандын айтымында, талашка түшкөн булактын суусун жайкысын жарым чакырымдай жерден тартып келсе, бакты азыктандыруу, түшүмүн жыйноо да кыйла каражатты чапчыйт.
Суу жетпеген бак үчүн жергиликтүү бийлик ага сугат жер катары ижара акы төлөтөт. Анын баасы мурда төрт жарым миң болсо, былтыртан бери ал үч эсеге көбөйгөн. Ижара акысын азайтууну талап кылып, Орозбү айым эки жылдан бери тиешелүү уюмдарга даттанып келүүдө.
Ара жылда бир түшүм берген бактын алмасын бышкан кезинде эле керектөөчүлөргө текейден арзан баага сатууга аргасыз болот. Анткени анын алмалары кышка сактоого жараксыз. Ошентип жыйырма жылдан ашык убакыттан бери өстүрүп келаткан бактын тагдыры чечилбей, Орозбү айым беймаза тартууда:
- Бу бакты кичинесинен өстүрдүм. Мына жыйырма эки жыл болуп баратат, андан бери мээнетимди эч ким баалаган жок.
Алма бактан мээнети акталбаган үчүн күйөөсү менен кызы оорулуу бул аял үй да кура алган эмес. Он тоннадай жыйнаган түшүмү өзү айткандай алты сомдон сатылса, 60 миң сомго араң жетет экен. Мынча акчага үй тургузууга мүмкүн болбогондуктан ал Орусияда иштеген бирөөнүн батиринде кичүү уулу менен баш калкалайт.
- Азыр курбумдун батиринде жашайм. Алманын акчасын ижара акыга төлөйбүз, быйыл ижара акысы да 13 миң сомго чыкты. Калган акча менен балам экөөбүз кыштан чыгабыз. Үй курганга пул деле калбай калат. Госрегистр бул жер кайракы экенин так жазып берген, башкалары эки жылдан бери жазып барсам деле, суулуу жер дегенден башканы айтпай атышат. Менин жанымдагы эле башка бактын ээлери ижара акысы кыйла аз.
Анын кошунасы Үрү Зулпукарова Орозбү айымдын эмгеги менен эч ким эсептешпегенин айтууда:
- Эски үйү жыгылайын деп араң эле турат, жер пайы деле жок окшойт. Сууну адырдан алып түшөт, үч жүз-төрт жүз метр бар. Ушул бечаранын абалын көрүп туруп деле, ушуга ыйгарып койсо болот да. Быйыл алмасына курт, мите түшүп, бир жарым тонна деле болбой калды окшойт.
Алма бак талаш болуп турат. Орозбү айым менен шаардык мамлекеттик каттоо мекемеси ал жерди кайракы деп эсептесе, алма бак аймагында турган шаардын Тайгараев айыл өкмөтү аны суулуу жер деп тастыктоодо. Жалал-Абад шаар бийлигинин атайын комиссиясы бул маселени чечүү үчүн республиканын жер долбоорлоо институтуна кайрылган.
Комиссиянын мүчөсү жана шаар бийлигинин жергиликтүү экономиканы өнүктүрүү бөлүмүнүн башчысы Салижан Умаровдун айтымында, Орозбү Маматованын өтүнүчү институттун жообунан кийин шаар кеңешинде каралуусу мүмкүн.
Анткен менен мыкты алма өстүргөндөр кыйла пайда табышаары айтылууда.
Ырысбай Абдыраимов
"Азаттыктын" Жалал Абад облусундагы кабарчысы, Кыргыз мамлекеттик университеттин журналистика бөлүмүн аяктаган.
