Коронавирус пандемиясынын айынан Украинадагы карын энелерден төрөлгөн ымыркайларына жете албай калган чет элдик ата-энелер акыры Киевге барышты. Бул тууралуу Украинанын омбудсмени Людмила Денисова билдирди. Анын айтымында, 31 түгөй балдарын колдоруна алышты.
Украинанын Тышкы иштер министрлиги ата-энелерге эки жума обсервацияда болуп, анализдеринен COVID-19 чыкпаган шартта гана балдары менен жолугушууга уруксат берди.
Жалпысынан Украина боюнча карын энелерден төрөлгөн 125тей бала чет жактагы ата-энелерин күтүп жатышкан.
Буга чейин карын энелердин кызматын сунуштаган Biotexcom компаниясы ата-энелери чек аралардын жабылып калганына байланыштуу Украинага жете албай калган алтымыштай наристенин видеосун жарыялап, бийликтен жардам сураган.
Омбудсмен Людмила Денисованын айтымында, дагы 88 үй-бүлө жакынкы жумаларда Киевге барат.
Украинада чет элдиктерге карын эненин кызматын сунуштаган 50дөй клиника бар.
