Кыргызстанда Ички аскерлер Улуттук гвардиянын курамынан чыгарылат. Тийиштүү жарлыкка президенти Сооронбай Жээнбеков 11-сентябрда кол койду.
"Жарлыктын негизги максаты — коомдук тартипти, инсандын жана коомдун коопсуздугун камсыз кылуунун мамлекеттик системасын жогорулатуу" - деп айтылат расмий кабарда.
2014-жылы аскердик реформалоонун алкагында Ички аскерлер Куралдуу күчтөрдүн түзүмүнө кирген Улуттук гвардиясынын курамына кошулган эле.
Президенттин жарлыгында белгиленгендей, Ички аскерлердин Улуттук гвардиянын курамында болуусу - Кыргызстандын ички коопсуздугун камсыз кылуу боюнча кызматтык-күжүрмөн милдеттерди чечүүдө алардын потенциалын жана мүмкүнчүлүктөрүн чектейт.
Global Firepower аскердик-аналитикалык порталы быйыл апрелде жарыялаган рейтингге ылайык, Кыргызстандын армиясы 136 өлкөнүн ичинде 91-орунду ээлеген. Рейтинг кайсыл өлкөнүн армиясы кудуреттуу экенин аныктоо максатында чыгарылат.