Ооганстандын чыгышында өздөрүн талибдер деп тааныштырган куралчан топ үйлөнүү үлпөтүнүн конокторуна ок чыгарып, кеминде эки кишини өлтүрүп, он адамды жарадар кылды. Окуяга тойдо жаңырган музыка себеп болгону айтылды.
Күбөлөрдүн бири "Би-Би-Си" кызматына Нангархар провинциясында төрт түгөй биргелешкен үйлөнүү үлпөт той уюштурганын билдирди.
Маалыматка караганда, той ээлери жергиликтүү талибдердин лидерлеринен майрам учурунда музыка колдонууга уруксат сурашкан. Музыка аялдар отурган жакта гана жаңырышы керек деген талап коюлган.
Кечке жуук куралчан адамдар тойго кирип, музыкалык жабдыктарды сындырууга аракет кылышкан. Тойдун катышуучулары аларга каршылык көргөзгөндө ок чыгарышкан.
"Талибандын" (Кыргызстанда ишмердигине тыюу салынган) өкүлү окуядан кийин кол салган үч адамдын экөө камакка алынганын маалымдады.
Талибдер өкмөтүнүн расмий катчысы Забиулла Мужахид "Твиттердеги" баракчасына кол салгандар кыймылдын атынан барганын, бирок чатак алардын жеке иштерине байланыштуу чыкканын жазды.
Ооганстанды 1996-жылдан 2001-жылга чейин башкарган мурдагы "Талибан" режими музыкага расмий түрдө тыюу салган. Августта Кабулдагы бийликти басып алган уюмдун азыркы жетекчилиги бул багытта буйрук жарыялай элек.
Дагы караңыз
Бийлик бутактарынан сүрүлгөн аялдарДоордун барагын жапкан Байжиев келбес жайга узадыПутин “Чоң жыйырмадан” Sputnik-V вакцинасын таанууга чакырдыИрандын расмий өкүлү АКШ менен Израилди кибер чабуул үчүн айыптадыБишкекте 1-ноябрдан баштап жол кире кымбаттайт