Мурдагы президент Алмазбек Атамбаевдин уулу, Жогорку Кеңештин депутаты Сеидбек Атамбаев атасынын наам, сыйлыктардан ажыратылышы тууралуу комментарий берди. Ал Фейсбуктагы баракчасына атасы сыйлыкка муктаж эмес экенин жазды.
"Сыйлык боюнча... Атам сыйлыкка муктаж эмес. Кандай иштеди, эмне кылды ага кудай, андан кийин эл тараза. Башкаларга окшоп элди аткан эмес, качкан эмес. Керек болсо, убагында түрмөдөн да эл чыгарып алган. Элден кечирим сураган, бул менимче, эң маанилүү", - деп жазды.
Алмазбек Атамбаев өзү соңку жагдай тууралуу азырынча үн ката элек.
Мунун алдында президент Садыр Жапаров Алмазбек Атамбаевди наамдарынан, сыйлыктарынан ажыратуу тууралуу жарлыкка кол койгон.
Президенттин администрациясы тараткан маалыматта, бул Бишкек шаарынын Биринчи май райондук сотунун 2025-жылдын 3-июнундагы өкүмүн аткаруу үчүн жасалганы белгиленген.
Ага ылайык, Атамбаев Кыргыз эл баатыры артыкчылык даражасынан, II даражадагы "Манас", "Данакер" ордендеринен жана "Даңк" медалынан ажыратылды. Башкы прокуратурага караштуу Сот аткаруучулар кызматына бул сыйлыктарды мамлекеттик сыйлыктар фондуна өткөрүп алуу тапшырылды.
Садыр Жапаров менен Алмазбек Атамбаев өткөн айда энергетика маселелерине байланыштуу кыйыр кайым айтышкан.
Жапаров Атамбаевди энергетика тармагын “сазга батырган” деп айыптап, 1990-жылдан 2010-жылга чейин Энергетика министрлиги 13,6 миллиард сом же 243 миллион доллар карыз болсо, кийинки он жылда 123 миллиард сомго жеткенин белгилеген.
Анын алдында Алмазбек Атамбаев өлкөдөгү энергетикалык кризис тууралуу Садыр Жапаровдун билдирүүсүнө жооп берип, анын бийлиги тушунда жасалган иштер тууралуу айтып, аларды жокко чыгарууга болбой турганын жазган. Ошондой эле азыркы бийликти энергетика тармагындагы маалыматтарды ачыкка чыгарбай жатканы жана майнинг фермалар боюнча айыптаган. Анын бийлигинин тушунда ири долбоорлор ишке ашканын белгилеген.
Алмазбек Атамбаев Кыргызстанды 2011-2017-жылдары башкарган. Ал 2019-жылы “Батукаев иши” боюнча Кой-Таштагы үйүндө кармалып, камакка алынган. 2023-жылы 14-февралда абактан бошотулган жана эртеси күнү дарылануу үчүн Испанияга учуп кеткен. Ошондон бери өлкөгө кайтып келе элек. Ал Кой-Таш окуясы боюнча ишти Гаагадагы Эл аралык кылмыш сотунда кароо демилгесин сунуштап келет.
2019-жылы 7-8-август күндөрү Алмазбек Атамбаевди колго түшүрүү операциясында чогулгандар менен күч кызматкерлери кагылышып, УКМК офицери Үсөнбек Ниязбеков каза болуп, 225 адам жабыркаган. Анын ичинен 91и ИИМдин, УКМКнын 40 кызматкери, калганы жөнөкөй жарандар болгон.
Сеидбек Атамбаев атасынын сыйлыктардан ажыратылышы жөнүндө комментарий берди
Сеидбек Атамбаев.