Кыргызстандагы улуттук айдоочулук күбөлүктүн акыркы варианты Вена конвенциясынын айрым жоболоруна дал келбейт. Бул тууралуу Жогорку Кеңештин вице-спикери, депутат Болот Ибрагимов парламенттин 1-апрелдеги жыйынында айтып чыкты. Ал президенттин иш башкаруучусунун орун басары Алмаз Раимбековдун маалыматын комментарийлеп жатып, жаңы үлгүдөгү айдоочулук күбөлүккө байланыштуу туура маалымат берүүгө чакырды.
“Кыргызстандагы улуттук айдоочулук күбөлүктүн акыркы варианты Вена конвенциясынын алтынчы тиркемесине төртүнчү пунктуна дал келбейт. Бул боюнча канча актанбайлы, факт ушул. Бул чындыкты канчалык эртерээк мойнубузга алсак, маселени ошончулук эрте чечет элек. Келечекте мындай нерсени кайталабайбыз деп үмүттөнөм”, - деди депутат.
Парламент жыйынында президенттин иш башкаруучусунун орун басары Алмаз Раимбеков жаңы үлгүдөгү айдоочулук күбөлүк Европанын айрым өлкөлөрүндө таанылбай жатканын четке кагып, маселе бир гана жеке ишкана документти кабыл албай койгонунан чыкканын билдирген. Ал айдоочулук күбөлүк бардык талаптарга жооп берерин жана бардык өлкөлөр тааный турганын кошумчалады.
Ибрагимов бул маалыматты четке кагып, соңку кырдаал боюнча жооптуу адамдарга укуктук баа берүү зарыл экенин кошумчалады.
Айрым кыргызстандыктар жаңы күбөлүктү кээ бир Европа өлкөлөрү тааныбай жатканын айтып, арызданууда.
31-мартта мамлекеттик мекемелер басма сөз жыйынын өткөрүп, бул маселе боюнча түшүндүрмө берген. Анда Президенттин иш башкармалыгынын өкүлдөрү Кыргызстан жаңы күбөлүктү басып чыгарардан мурун дүйнөлүк стандарт талап кылган бардык техникалык талаптарды сактаганын, ал бардык мамлекетте таанылышы керектигин айтышкан.
Айдоочулук күбөлүктү берүүдөгү реформанын алкагында ушул жылдын январь айынын орто ченинен тарта жаңы үлгүдөгү күбөлүктөр бериле баштаган. Анын мурдагы күбөлүк менен өңү жана түзүлүшү боюнча айырмасы чоң. Күбөлүктү басып чыгаруу, реформалоо менен Президенттин иш башкармасы алектенип жатат.
Дагы караңыз
"4,1 млрд сом зыян келтирилген". Шаирбек Ташиевди каматкан жагдай, "Кыргызнефтегаз" иши