17-августта Жогорку сот Фейсбуктун колдонуучусу Мирланбек Маратбек уулун Кылмыш-жаза кодексинин 332-беренеси - “Экстремисттик материалдарды даярдоо, таратуу” менен күнөөсүз деп таап, толук актады. Бул тууралуу ал Фейсбуктагы баракчасына видео жарыялап “муну менен өлкөдө адилеттик орноду дегенге болбой турганын, мыйзамсыз кармалып абакта жаткандар чыгып, аларга иш козгогондор жазага тартылышы керектигин” айтты.
Ысык-Ата райондук соту Мирланбек Маратбек уулун 2025-жылдын февраль айында актаган. Кийин Чүй облустук соту өкүмдү жокко чыгарып, ишти кайра биринчи инстанцияга кайтарган. Райондук сот кайра актоо өкүмүн чыгарып, облустук сот кийин ал чечимди күчүндө калтырган.
2024-жылы 15-августта Ысык-Көл облусунун Каракол шаардык ички иштер бөлүмүнүн кызматкерлери Фейсбуктагы баракчасында бийликти сындаган постторду жазган Мирланбек Маратбек уулунун Чүй облусундагы үйүн тинтүүгө алган.
Облустук милициянын басма сөз кызматы анын Чүй облусундагы үйүн тинтүү Каракол шаардык сотунун токтомунун жана козголгон кылмыш ишин тергөөнүн алкагында болгонун, Мирланбек Маратбек уулунун бийликке айткан сын-пикирине тиешеси жок экенин билдирген.
Ал мыйзамга каршы эч кандай иш кылбаганын жана үйүндө тыюу салынган буюм-тайым, материалдар жок экенин айткан.
Мирланбек Маратбек уулу Фейсбукта бийликти сындаган билдирүүлөрдү жазып келет. 2024-жылы 1-январда Бишкектеги “Ала-Тоо” аянтындагы флагштокко өзгөртүлгөн желекке байланыштуу макулдашылбай илинген туу боюнча күнөөлүүлөрдү жазага тартууну талап кылып, прокуратурага бир нече жолу арыз жазган. (BTo)