Жапонияда өтүп жаткан XX жайкы Азия оюндарында грек-рим күрөшү боюнча таймаштарда Акжол Махмудов (77 кг чейин) алгачкы беттешинде атаандашына утулуп калды. Махмудов учурдагы олимпиада чемпиону, жапониялык балбан Нао Кусака менен килемге чыгып, 0:1 эсебинде жеңилди. Кусака эки атаандашын утуп, финалга чыккандан кийин, Махмудовго кайра килемге чыгууга мүмкүнчүлүк жаралды.
Ал жооткотуучу беттеште казакстандык балбан Демеу Жадраевди 10:1 эсебинде утту. Эми ал коло үчүн кытайлык Лю Руи менен беттешет.
Ушул эле күнү кыргызстандык балбан Жоламан Шаршенбеков (60 кг чейин) 1/8 финалда кореялык Ким Да Хёнду 9:0, чейрек финалда түркмөнстандык спортчу Азатжан Очиловду 8:0 эсебинде утуп, жарым финалга чыкты.
Кыргызстандык балбандын кийинки атаандашы - ирактык Албидхан Сажжад Али Мукаср.
1-октябрда күрөштүн ушул түрүнөн Үзүр Жусупбеков (97 кг чейин) жана кыз-келиндер күрөшүүнөн Сезим Жуманазарова (62 кг) да беттештерге чыгат.
30-октябрда Кыргызстандык курама командасы үч медал уткан.
Грек-рим күрөшүнөн Асан Жанышов (87 кг чейин) күмүш, Раззак Бейшекеев (67 кг) менен кыз-келиндер күрөшүнөн Мээрим Жуманазарова (68 кг чейин) коло медал алды.
Азия оюндарынын 11-күнүндө Кыргызстан эки күмүш жана алты коло медалга ээ болду.