Израилде Газадагы согуш башталгандан берки биринчи парламенттик шайлоо өтүп жатат.
7,3 миллиондон көп шайлоочу үчүн өлкө боюнча 12 миңден ашык добушкана ачылган. Добуштар баскыч-баскыч менен эсептелип, расмий жыйынтык 4-ноябрда жарыяланмакчы.
Бул шайлоо премьер-министр Биньямин Нетаньяхунун согуш мезгилиндеги коопсуздук кризисин жөнгө салуу жөндөмү жана анын саясий мурасы боюнча улуттук референдум катары кабыл алынууда.
Парламенттеги 120 орун үчүн 36 партия ат салышууда. Дээрлик 19 жыл бийликте турган өкмөт башчынын “Ликуд” партиясына башкы атаандаш болуп ЦАХАЛдын (Израилдин куралдуу күчтөрү) мурдагы командачысы, “Яшар” партиясынын лидери Гади Айзенкот чыккан.
Акыркы сурамжылоолор көрсөткөндөй, Нетаньяхунун оңчул блогу да, Айзенкот жетектеген оппозициялык коалиция да өкмөттү өз алдынча түзүү үчүн зарыл болгон парламенттик көпчүлүктү камсыздай албайт деп болжолдонууда.
Шейшембиде түшкө чейин өнөктүккө шайлоочулардын 31,5% катышканы кабарланды. Бул – 1973-жылдан берки эң жогору көрсөткүч болду.
Нетаньяхунун сынчылары ал ХАМАСтын кол салуусун алдын ала алган жок, кемчиликтер көп болгон деп айтышат. Премьер ката кетиргенин четке кагууда.
Согушта уулун жана эки жээнин жоготкон Айзенкот армиянын же дипломатиянын жардамы менен болобу, палестиналык согушкер топтун Газа тилкесинин үстүнөн көзөмөлүнө чекит коеруна убада кылып келди.
Андан тышкары Нетаньяху шайлоо кампаниясын Иранга туруштук берүү урааны астында жүргүздү.