Бразилиялык сенатор, 25-октябрда өткөн президенттик шайлоодо жеңилген талапкер Флавиу Болсонарунун дайыны АКШдан чыкты. Ал шайлоодон кийин дайынсыз болуп жаткан. 28-октябрда үй-бүлөсү менен Кошмо Штаттарына барганы маалым болду.
Маалыматтарга караганда, Болсонару шайлоонун экинчи айлампасында утулгандан кийин акчаны адалдоо боюнча иликтөөнүн алкагында бийлик анын жалпы жарандык паспортун алууну чечкен. Болсонару Бразилиядан шашылыш чыгып кеткен.
АКШга баргандан кийин көп өтпөй Болсонару тарапташтары аркылуу кайрылуу жасап, өзүн Бразилиянын "мыйзамдуу шайланган президенти" деп атады.
45 жаштагы Флавиу Бразилиянын мурдагы президенти, коррупцияга байланыштуу соттолуп, учурда үй камагында отурган Жаир Болсонарунун уулу.
28-октябрда Аргентинанын Улуттук миграция башкармалыгы Болсонару жубайы жана эки кызы менен Бразилияга чектеш Мисьонес провинциясындагы Танкреду Невис эл аралык чек ара өткөрмө бекети аркылуу Аргентинага мурдагы күнү кечинде киргенин, андан ары Эквадорго жеке учак менен кеткенин билдирди.
Аргентина тарап Болсонару жана анын үй-бүлө мүчөлөрүнүн документтери так экенин, алардын өлкөгө киришине эч кандай укуктук тоскоолдук болбогонун айтууда.
Кийинчерээк Болсонарунун учагы Майаминин жанындагы "Опа-Лока" аэропортуна конгону белгилүү болду. Алардын АКШда калышына уруксат берилеби, жокпу, азырынча белгисиз.
Бразилияда 25-октябрда өткөн президенттик шайлоонун экинчи айлампасында солчул "Эмгекчилдер партиясынын" лидери Луис Инасиу Лула да Силва жеңишке жеткен. Лула шайлоонун биринчи турун жеңген Флавиу Болсонарудан озуп чыккан.