4-октябрга караган түнү Түштүк Кореянын Пхёнтхэк шаарында жапырт мушташ учурунда бир нече кыргыз жараны денесинен жараат алышкан. Бул тууралуу Кыргызстандын Тышкы иштер министрлиги (ТИМ) маалымдады.
Маалыматка ылайык, жапырт мушташ катталган күнү эле Кыргызстандын аталган өлкөдөгү консулу окуя болгон жерге ыкчам барып, кармалган кыргызстандыктар, Түштүк Кореянын укук коргоо жана медициналык кызматкерлери менен жолугушууларды өткөргөн.
"Жараат алган мекендештердин абалына туруктуу негизде мониторинг жүргүзүлүп, алардын укуктарын жана мыйзамдуу кызыкчылыктарын коргоо боюнча бардык зарыл чаралар көрүлүүдө. Жараат алган жана кармалган кыргызстандыктардын туугандары менен байланыш түзүлгөн. Учурда тергөө иштери жүрүп жатат", - деп жазылган маалыматта.
ТИМдин басма сөз кызматы аталган маселе министрликтин өзгөчө көзөмөлүндө турганын кошумчалады.
Буга чейин Түштүк Кореянын жергиликтүү басылмалары Пхёнтхэк шаарында Борбор Азиядан барган жарандардын арасында жапырт мушташ болгонун жазып чыгышкан. Социалдык тармактарда мушташка Кыргызстандын, Казакстандын жана Тажикстандын жарандары катышып, түрдүү жараат алгандар бардыгы тууралуу маалыматтар тараган.
ТИМдин маалыматына ылайык, бул өлкөдө 15 миңге жакын кыргызстандык эмгек мигранты иштейт. Анын ичинде 1600дөн ашуун кыргызстандык EPS программасы аркылуу мыйзамдуу иштеп жүргөндөр.(ZKo)