Бишкекте Улуттук госпиталдын ординатору ага бейтаптын жакындары кол салып, ооруканага түшкөнүн билдирди. Медиктердин кесиптик уюмунун жетекчиси Бермет Барыктабасова дарыгер “тоскоол болбогула” деп суранганда, бейтаптын атасы кол көтөргөнүн айтты. Бирок бейтаптын жакындары арыз жазып, анын негизинде милиция дарыгердин өзүн үч суткага камаганы белгилүү болду. Милиция дарыгердин үстүнөн арыз түшкөнүн, “майда бейбаштык” беренеси менен иш козгоп, сот үч суткага камоо чечимин кабыл алганын ырастады.
Кылмыш
Босния жана Герцеговинада 30 жыл мурдагы эл аралык коомчулук геноцид деп тааныган Сребреница кыргынынын курмандыктары эскерилүүдө. 11-июлда Потокари мемориалдык борборуна жүздөгөн адамдар жана чет өлкөлүк делегациялар чогулду. 1995-жылдын 11-июлунан кийинки бир нече күндө Сребреница шаарчасынын жака белинде босниялык сербдер 8000дей босниялык мусулман эркекти жана балдарды өлтүргөн. БУУнун мурдагы Югославия боюнча эл аралык трибуналы Сребреницадагы кыргынды геноцид деп тааныган. Бул кылмыштар үчүн 54 киши жоопко тартылып, жалпысынан 800 жыл түрмөгө кесилген. 30 жылдан бери 1200 кишинин сөөгү табыла элек. Издөө иштери дагы деле уланууда.
