БИШКЕК. Жогорку Кеңештин Мыйзам чыгаруу жыйынынын депутаты Азимбек Бекназаров шаршембиде өлкөнүн Конституциялык Сотуна кайрылуу жолдоду. Анда Кыргызстандын «Конституциялык сот өндүрүшү жөнүндөгү» Мыйзамдын 17- жана 22-беренелеринин бузулбашы үчүн Мыйзам чыгаруу жыйынынын 11 депутаты 2002-жылдын 16-майында Конституциялык сотко жолдогон арызын кароону тездетүү өтүнүчү билдирилген. Өз арызында депутаттар 1997 жана 2002-жылы кыргыз-кытай чек ара макулдашуусун ратификациялоо Конституциянын бир нече беренелерин бузуу менен болгонун билдиришкен. Азимбек Бекназаровдун маалыматы боюнча, Конституциялык Сот берилген арызды 6 айдын ичинде карап, тийиштүү чечим чыгарыш керек, бирок ишти кароо убактысы ушул кезге чейин белгилене элек.
