БИШКЕК. Кыргызстанда дагы бир саясий партиянын каттоодон өтүшү күтүлөт. Бул партия «Туран» деген аталыш менен катталмакчы. Жекшембиде аталган партиянын уюштуруу тобунан алынган маалыматка караганда, анын уюштуруу курултайы февраль айынын аягына чейин өткөрүлөт. Партия өлкөдөгү саясий жараяндарга, парламенттик жана жергиликтүү бийлик органдарына боло турган шайлоолорго активдүү катышуу, өлкөнүн экономикалык жана социалдык абалын жакшыртууга көмөктөшүү сыяктуу максаттарды коет. «Туран» партиясынын уюштуруу тобуна бир катар жаш саясатчылар, илимпоздор жана бизнес чөйрөсүнүн өкүлдөрү кирет.
