БИШКЕК. Мыйзам чыгаруу жыйыны «Кыргызстандын «Чет өлкөлүк атуулдардан алимент алуу тууралуу эл аралык конвенцияга» кириши жөнүндөгү» мыйзамды кабыл алды. Бул тууралуу бүгүн Мыйзам чыгаруу жыйынынын басма сөз кызматы кабарлады. Былтыр чет өлкөлүк атуулдардан алимент өндүрүп берүүнү өтүнүп, Кыргызстандын Юстиция министрлигине 176 аял, быйылкы жылдын соңку 9 айында 209 аял кайрылган. Ал эми кыргызстандык атуулдардан алимент алуу өтүнүчү менен Юстиция министрлигине буга чейин чет элдик 120 аял кайрылган.
