БИШКЕК. Кыргызстандагы саясий абал парламенттик шайлоонун экинчи айлампасынын алдында курчуп баратат. Өзгөчө Ош шаарындагы кырдаал опурталдуу. Бул тууралуу 12-мартта Эл биримдиги Координациялык кеңеши өткөргөн жыйында айтылды. Кеңештин мүчөлөрү жер-жерлердеги нааразылык акцияларынын катышуучуларына карата күч колдонула баштагандыгын сынга алышты. «Атуулдук коом коррупцияга каршы» бейөкмөт уюмунун төрайымы Төлөйкан Исмаилованын маалыматына караганда, 11-мартта Чүй облусундагы Ивановка айылында нааразылык акцияга чыккан 300гө жакын пикетчинин 50гө жакыны милиция кызматкерлери тарабынан ур-токмокко алынды. Ал эми ички иштер министрлигинин маалымат кызматы жана Чүй районунун ички иштер бөлүмү мындай маалыматты төгүнгө чыгарышты. 12-март күнү да Ивановка айлында 100дөн ашуун адам пикетке чыкты. Алар №59 Чүй округунан парламентке талапкер Туратбек Андашевдин кайрадан катталышын талап кылышууда. Эл Биримдиги Координациялык кеңешинен билдиришкендей, эгерде бийлик мындан ары да мыйзам бузууларга барса, өлкөдөгү кырдаал курчуп кетиши ыктымал.
