ЖАЛАЛАБАТ. 18-апрелде өлкөнү мунай жана газ менен камсыздоочу “Кыргызмунайгаз” акционердик коомунун жамааты иш ташташты. Буга мекеменин деректирлигине эл каалабаган адамдын дайындалышы себеп болду. Жыйын уюштургандар кадр маселесин эл менен кеңешип чечүүнү, деректирликке мекемеде таза иштеген кызматкерлердин бирөөнү дайындоону, трайбализм менен жердешчиликти жоюуну талап кылышты. Экстремисттик “Хизб-ут Тахрир” уюму акыркы күндөрдө облуста активдүүлүгүн күчөткөнүн белгилеген губернатор Жусупжан Жээнбеков коомчулукту жаштар менен иштешүүгө чакырып, ишканадагы бир күндүк иш таштоодон экономика 1,5 миллион сом зыян тартаарын айтты. Акцияга эки миңдей адам катышып, ишкананын деректирлигине Тимур Мураталиев шайланды.
