Тажик оппозициялык партиясы Элдик кеңештен чыгып кетти

Тажикстандын Демократиялык партиясы бүгүн атайын билдирүү жасап, президенттин алдындагы Элдик кеңештен чыккандыгы тууралуу жарыялады:

- Бул уюмдун чечимдери баары бир аткарылбагандыктан, акыркы парламенттик шайлоо демократиялык эмес өткөрүлгөндүктөн жана партия жетекчиси Махмадрузи Искандаров Маскөөдө кармалып, Тажикстанга өткөрүлүп берилгендиктен, биз бул Кеңештеги мүчөлүгүбүздү убактылуу токтотобуз, - деп билдирди партия төрагасынын орун басары Рухматулло Валиев. Кармалган Искандаров терроризмден күнөөлөнүүдө, ал Маскөөдө декабрда кармалган, бирок апрелде бошотулган жана дароо жоголуп кетип, кийин Тажикстанда камакта пайда болду.